Президент бюджетдан ссуда олган ва ўзини ўзи рағбатлантирган “Ўзгидромет” раҳбарини танқид қилди. Ҳолат 8 ой аввал содир этилган бўлса-да, вазирлик масъуллари изоҳ бермай келмоқда

Гидрометеорология хизмати марказининг бош директори Шерзод Ҳабибуллаев 2023 йилнинг май ойида ўзини ўзи 46 миллион сўм билан рағбатлантирган эди.

Буйруқда “Ўзгидромет”да ижро интизоми бўйича масъул бўлган ходимларни рағбатлантириш кўзда тутилган. Аниқроғи, 2022 йилда келиб тушган мурожаатлар, ҳужжатлар, топшириқлар, буйруқ ва фармойишлар ижросини ўз вақтида сифатли бажаришда фаол иштирок этган ходимлар рағбатлантирилган.

Юқорида зикр этилган вазифаларни бажаришда фаол иштирокчи сифатида бош директор Шерзод Ҳабибуллаев ўзини ва ўринбосари Ибратжон Каримовни қайд этган. У ўзи ва ўринбосарини меҳнатга ҳақ тўлашнинг энг кам миқдорининг (920 минг сўм) 50 баробарида, яъни 46 миллион сўм билан рағбатлантирган.

Марказнинг мурожаатлар билан ишлаш ва ижро интизоми бўлими бошлиғи  Дилмурод Қориевга эса меҳнатга ҳақ тўлашнинг энг кам миқдори (МҲТЕКМ) 5 баробари — 4 миллион 6 минг сўм рағбатлантириш ёзилган. Ушбу бўлимнинг 1 тоифали мутахассиси К.Баҳромовга эса МҲТЕКМ 2 баробари — 1 миллион 840 минг сўм берилган.

Яна бир қизиқ жиҳати, мазкур буйруққа бош директор ўринбосари Фируз Сафаровнинг билдиришномаси асос қилиб олинган. Кўринадики, Фируз Сафаров бош директорни рағбатлантиришни сўраб бош директорга билдиришнома киритган ва у Шерзод Ҳабибуллаев томонидан маъқулланган.

Президент танқиди

Президент Шавкат Мирзиёев раислигида 16 январь куни ўтказилган видеоселектор йиғилишида бюджетдан 2023 йилда қанча ноқонуний харажат, камомад ва ўғриликларга йўл қўйилгани маълум қилинди. Хусусан, “Ўзгидромет” раҳбарияти бюджетдан ташқари маблағлар ҳисобидан асоссиз 1,3 миллиард сўм ссуда олган, шунингдек, ўзига бир неча баробар кўпроқ миқдорда мукофотлар ёзиб келгани танқид қилинди.

Саккиз ойдан буён изоҳ йўқ

Табиат ресурслари вазирлиги ҳолат юзасидан хизмат текшируви тайинлаган ва тегишли тартибда ўрганиш ишлари олиб борилаётганини маълум қилган эди.

“Дарё” нашрининг вазирлик ахборот хизматига мазкур масала юзасидан изоҳ сўраб бир неча маротаба йўллаган мурожаатига воқеадан 8 ой ўтган бўлса-да, ҳеч қандай жавоб берилганича йўқ. Ўйлаймизки, АОКА ва тегишли идоралар вазифасига совуққонлик билан қараган ходимларга нисбатан тегишли тартибда чора кўради.