“O‘zgidrometeorologiya”ning bosh direktori o‘ziga o‘zi 46 mln so‘m rag‘batlantirish yozgan holati ishchi guruh tomonidan o‘rganilmoqda” — Tabiat resurslari vazirligi

Gidrometeorologiya xizmati markazining bosh direktori Sherzod Habibullayev o‘zini o‘zi 46 million so‘m bilan rag‘batlantirgani haqidagi buyruq nusxasi ijtimoiy tarmoqlarda keng muhokamalarga sabab bo‘lmoqda.

Xodimlarni rag‘batlantirish to‘g‘risidagi buyruq Gidrometeorologiya xizmati markazining bosh direktori Sherzod Habibullayev tomonidan chiqarilgan. Unga ko‘ra, “O‘zgidromet”da ijro intizomi bo‘yicha masʼul bo‘lgan xodimlarni rag‘batlantirish ko‘zda tutilgan. Aniqrog‘i, 2022-yilda kelib tushgan murojaatlar, hujjatlar, topshiriqlar, buyruq va farmoyishlar ijrosini o‘z vaqtida sifatli bajarishda faol ishtirok etgan xodimlar rag‘batlantirilgan.

Yuqorida zikr etilgan vazifalarni bajarishda faol ishtirokchi sifatida bosh direktor Sherzod Habibullayev o‘zini va o‘rinbosari Ibratjon Karimovni qayd etgan. U o‘zi va o‘rinbosarini mehnatga haq to‘lashning eng kam miqdorining (920 ming so‘m) 50 barobarida, yaʼni 46 million so‘m bilan rag‘batlantirgan.

Markazning murojaatlar bilan ishlash va ijro intizomi bo‘limi boshlig‘i  Dilmurod Qoriyevga esa mehnatga haq to‘lashning eng kam miqdori (MHTEKM) 5 barobari — 4 million 6 ming so‘m miqdorida rag‘batlantirish yozilgan. Ushbu bo‘limning 1 toifali mutaxassisi K.Bahromovga esa MHTEKM 2 barobari — 1 million 840 ming so‘m berilgan.

Yana bir qiziq jihati, mazkur buyruqqa bosh direktor o‘rinbosari Firuz Safarovning bildirishnomasi asos qilib olingan. Ko‘rinadiki, Firuz Safarov bosh direktorni rag‘batlantirishni so‘rab bosh direktorga bildirishnoma kiritgan va u Sherzod Habibullayev tomonidan maqullangan.

Holat o‘rganilmoqda

Tabiat resurslari vazirligining maʼlum qilishicha, hozirda holat yuzasidan xizmat tekshiruvi tayinlangan va tegishli tartibda o‘rganish ishlari olib borilmoqda.

“Tekshiruv natijasi bo‘yicha Tabiat resurslari vazirligi tomonidan qonunga muvofiq ravishda tegishli choralar ko‘rilishi maʼlum qilinadi”, deyiladi vazirlik axborotida.

Gidrometeorologiya xizmati markazi matbuot kotibi Munisaxon Asilxojayevaning “Daryo”ga maʼlum qilishicha, mazkur holat haqiqatan ham vazirlik tomonidan tuzilgan ishchi guruh tomonidan o‘rganilmoqda.