Toshkentda otasi Ichki ishlar vazirligida ishlashini aytib, bir necha yo‘l harakati qoidalarini buzgan holda avtomobil boshqargan yigitning onasi javobgarlikka tortildi, deb xabar beradi IIV YHXX axborot xizmati.
Qayd etilishicha, surishtiruvda ijtimoiy tarmoqlarda tarqalgan videodagi shaxs 2006-yilda tug‘ilgani aniqlanib, yigit va uning onasi bilan suhbat uyushtirilgan. Jarayonda yigit otasi vazirlikda emas, balki “O‘zdonmahsulot” AJda ishlashi, bu gapni video olish uchungina aytganini taʼkidlagan.
Yigit o‘z mashinasidan tashqari boshqa fuqaroga tegishli Equinox avtomobilini va yana boshqa mashinalarni ham boshqargani aniqlangan. Bu holatlarda bir nechta qoidabuzarliklarga yo‘l qo‘yilgan va ular tasvirga olinib, ijtimoiy tarmoqlarga joylangan.
“Video ijtimoiy tarmoqlarda tarqalib ketdi. Shota Rustaveli ko‘chasida tezligimiz 174−176 atrofida bo‘lgan. O‘shanda o‘zimiz uchun videoga olib, Telegram kanalga tashlagandik. U yerdan tarqalib ketibdi. U yerda ko‘p marta svetofor qizil chirog‘idan o‘tilgan. Qilgan ishimdan afsusdaman. Tezlik yaxshi narsaga olib kelmas ekan. Hozir mashinamiz jarima maydonida. Guvohnomasiz harakatlanganim uchun chora ko‘rishdi”, — deydi yigit.
Yigit boshqargan boshqa shaxsga tegishli Equinox avtomobili ham topilib, jarima maydonchasiga joylashtirilgan. Yigitning qilgan harakati yuzasidan uning onasiga nisbatan Maʼmuriy javobgarlik to‘g‘risidagi kodeksning 47-moddasi bo‘yicha (bolalarni tarbiyalash va ularga taʼlim berish borasidagi majburiyatlarni bajarmaslik) maʼmuriy bayonnoma rasmiylashtirilgan va BHMning 5 baravari miqdorida (1 million 700 ming so‘m) jarima belgilangan.
Avvalroq Namangan viloyatida voyaga yetmagan shaxs otasining Equinox avtomobilida qator qoidabuzarliklar sodir etib, YTHga uchragani to‘g‘risida xabar berilgandi.
Izoh (0)