Toshkent shahar Chilonzor tumanida yangi yil kechasi qo‘pol qoidabuzarlik sodir etgan yigitlar javobgarlikka tortildi. Bu haqda “Vaziyat 24” informatsion dasturida ma’lum qilindi.
Qayd etilishicha, 2024-yil 1-yanvar kuni soat 00:10 da Chilonzor tumani So‘galli ota ko‘chasida joylashgan “Zarhal” to‘yxonasi oldida to‘rt nafar fuqaro bir nechta mashinada turli avariyaviy holatlar sodir etib, avtomobil boshqargan.
Ushbu fuqarolar hududda xizmat olib borayotgan ichki ishlar xodimlarining qonuniy talablariga bo‘ysunmasdan, jamiyatda yurish-turish qoidalarini qasddan buzgan. Shuningdek, voyaga yetmagan ikki nafar shaxsning ota-onasiga nisbatan Ma’muriy javobgarlik to‘g‘risidagi kodeksning 47-modda (bolalarni tarbiyalash va ularga ta’lim berish borasidagi majburiyatlarni bajarmaslik) 1-qismi bilan chora ko‘rilgan.
Aniqlanishicha, shu kuni qoidabuzarlik sodir etib, mashina haydagan shaxslarning birortasida haydovchilik guvohonasi bo‘lmagan.
Jinoyat ishlari bo‘yicha Chilonzor tuman sudi tomonidan to‘rt nafar fuqaro Ma’muriy javobgarlik to‘g‘risidagi kodeksning 183 (mayda bezorilik) hamda 194-moddalarida (Ichki ishlar organlari xodimining qonuniy talablarini bajarmaslik) nazarda tutilgan huquqbuzarlikni sodir etganlikda aybli deb topildi. Ularning har biriga BHMning bir baravari miqdorida (340 ming so‘m) jarima hamda 15 sutka ma’muriy qamoq jazosi tayinlandi.
Samarqand shahrida 2023-yil 1-yanvarga o‘tar kechasi Mercedes-Benz’da drift qilgan haydovchi javobgarlikka tortilgan edi. Undan oldin esa Nukusda raqamsiz harakatlanib, drift qilgan “shumaxer” topilgandi.
Izoh (0)