Namangan viloyatida voyaga yetmagan shaxs otasining Equinox avtomobilida qator qoidabuzarliklar sodir etib, YTHga uchradi. Bu haqda IIV YHXX axborot xizmati xabar berdi.
Ijtimoiy tarmoqlarda Namanganda avtoraqamsiz holda qoidalarni buzib yurgan Equinox mashinasi tasvirlangan video tarqaldi. Ma’lum qilinishicha, videoda tasvirlangan holat 2023-yil sentyabr oyida sodir bo‘lgan. 2007-yilda tug‘ilgan o‘smir otasi xizmat safariga ketganidan foydalanib, unga tegishli mashinani so‘roqsiz haydagan.
U mashina davlat raqamlarini yechib, shahar ko‘chalari bo‘ylab qoidalarni qo‘pol tarzda buzgan holda harakatlangan. So‘ng holatni videoga olib, ijtimoiy tarmoqlarga joylagan.
Namangan viloyati IIB YHXB xodimlari tomonidan o‘smir va mashina topilib, unga nisbatan tegishli choralar ko‘rilgan.
Jumladan, mashina egasiga nisbatan:
- davlat raqamlarini o‘zboshimchalik bilan yechib harakatlangani uchun Ma’muriy javobgarlik to‘g‘risidagi kodeksning 125-moddasi 5-qismi bilan;
- haydovchi yoshiga yetmasdan tegishli hujjatlarsiz mashina boshqargani va voyaga yetmagan shaxsga transport vositasini boshqarishga topshirgani uchun Ma’muriy javobgarlik to‘g‘risidagi kodeksning 135-moddasi 2-qismi bilan;
- tegishli ruxsat olmasdan mashinaga tovush chiqaruvchi va maxsus yoritish uskunasini o‘rnatgani uchun Ma’muriy javobgarlik to‘g‘risidagi kodeksning 127-moddasi 2-qismi bilan;
- yo‘l harakati qoidalarini buzib, avariya holatini keltirib chiqargani uchun Ma’muriy javobgarlik to‘g‘risidagi kodeksning 128-prim 5-moddasi 2-qismi bilan ma’muriy bayonnomalar rasmiylashtirilgan.
“Bu turdagi qoidabuzarliklar ortidan mashina jarima maydoniga joylashtirilishi kerak edi. Biroq o‘smir yo‘l-transport hodisasiga uchragani va mashina ta’mirda bo‘lgani uchun buning iloji bo‘lmagan”, — deyiladi xabarda.
Avvalroq Namangan shahar Islom Karimov ko‘chasida 1-yanvar kechasi bir qator qoidabuzarliklarni sodir etgan Mercedes-Benz haydovchisiga chora ko‘rilgani to‘g‘risida xabar berilgandi.
Izoh (0)