Тошкентда отаси Ички ишлар вазирлигида ишлашини айтиб, бир неча йўл ҳаракати қоидаларини бузган ҳолда автомобиль бошқарган йигитнинг онаси жавобгарликка тортилди, деб хабар беради ИИВ ЙҲХХ ахборот хизмати.
Қайд этилишича, суриштирувда ижтимоий тармоқларда тарқалган видеодаги шахс 2006 йилда туғилгани аниқланиб, йигит ва унинг онаси билан суҳбат уюштирилган. Жараёнда йигит отаси вазирликда эмас, балки “Ўздонмаҳсулот” АЖда ишлаши, бу гапни видео олиш учунгина айтганини таъкидлаган.
Йигит ўз машинасидан ташқари бошқа фуқарога тегишли Equinox автомобилини ва яна бошқа машиналарни ҳам бошқаргани аниқланган. Бу ҳолатларда бир нечта қоидабузарликларга йўл қўйилган ва улар тасвирга олиниб, ижтимоий тармоқларга жойланган.
“Видео ижтимоий тармоқларда тарқалиб кетди. Шота Руставели кўчасида тезлигимиз 174−176 атрофида бўлган. Ўшанда ўзимиз учун видеога олиб, Telegram каналга ташлагандик. У ердан тарқалиб кетибди. У ерда кўп марта светофор қизил чироғидан ўтилган. Қилган ишимдан афсусдаман. Тезлик яхши нарсага олиб келмас экан. Ҳозир машинамиз жарима майдонида. Гувоҳномасиз ҳаракатланганим учун чора кўришди”, — дейди йигит.
Йигит бошқарган бошқа шахсга тегишли Equinox автомобили ҳам топилиб, жарима майдончасига жойлаштирилган. Йигитнинг қилган ҳаракати юзасидан унинг онасига нисбатан Маъмурий жавобгарлик тўғрисидаги кодекснинг 47-моддаси бўйича (болаларни тарбиялаш ва уларга таълим бериш борасидаги мажбуриятларни бажармаслик) маъмурий баённома расмийлаштирилган ва БҲМнинг 5 баравари миқдорида (1 миллион 700 минг сўм) жарима белгиланган.
Аввалроқ Наманган вилоятида вояга етмаган шахс отасининг Equinox автомобилида қатор қоидабузарликлар содир этиб, ЙТҲга учрагани тўғрисида хабар берилганди.
Изоҳ (0)