Futbol bo‘yicha O‘zbekiston terma jamoasi Osiyo Kubogidagi yurishini Suriyaga qarshi bahs bilan boshlaydi. Uchrashuv 13-yanvar kuni bo‘lib o‘tadi.
O‘yin oldidan O‘zbekiston terma jamoasi bosh murabbiyi Srechko Katanes hamda jamoa sardori Jaloliddin Masharipov ishtirokida matbuot anjumani bo‘lib o‘tdi.
-5OlhTdYx.jpg)
Eldor Shomurodov biz uchun qanchalik muhim futbolchi ekanligini yaxshi bilasiz. Har qanday terma jamoa Masharipov va Shomurodov singari futbolchilarga ega bo‘lishni xohlaydi. Jamoamizda yetakchi futbolchilar ko‘p, biroq uning tajribasi bizga juda kerak edi. Murabbiy sifatida ayta olamanki, biz eng yaxshi o‘yinimizni ko‘rsatamiz.
Guruhdagi barcha bahslar muhim. Ayniqsa, birinchi o‘yindagi g‘alaba katta ta’sir o‘tkazadi. Uni yutgandan so‘ng, qolganlari osondek tuyulishni boshlaydi. Barcha uchrashuvga jiddiy yondashuv bilan tayyorgarlik ko‘ramiz.
Ertangi uchrashuvda o‘z o‘yinimizni ko‘rsatib, g‘alaba qozonishga va yaxshi natija qayd etishga harakat qilamiz.
Suriyaga qarshi avval ham ikkita uchrashuv o‘tkazganman, Suriya kuchli jamoa, ularga qarshi o‘ynash juda qiyin. Jamoaning kuchsiz tomonlari ham bor, ular haqida yetarli ma’lumotga egamiz. Aksariyat futbolchilari xorijlik, biz shunga e’tibor qaratishimiz kerak. Ertangi bahsda yaxshi o‘yin ko‘rsatib, g‘alaba qozonamiz.
Srechko Katanes, O‘zbekiston terma jamoasi bosh murabbiyi
Osiyo Kubogida 2-marta ishtirok etyapman. Bundan judayam xursandman. O‘yinlarga tayyormiz deb o‘ylayman. O‘zbekistondan bizni qo‘llab-quvvatlash uchun muxlislar ham yetib keldi.
2019-yilgi Osiyo Kubogidagi ikki nafar futbolchi, men bilan Shukurov hozir ham tarkibdamiz. Eldor esa jarohati sababli qatnasha olmayapti. Hozir bizda ko‘proq intizom, ko‘proq o‘yin uslubi va ishonch bor deb hisoblayman. Avvalgi tarkibda katta nomlar, tajriba bo‘lgan bo‘lishi mumkin, hozir esa o‘yin uslubi, birdamlik borasida ham yutib ketamiz deb o‘ylayman.
Birinchi ishtirokimda ham yomon qatnashmaganmiz. Guruhdan chiqqach, Avstraliyaga qarshi o‘ynaganmiz. Munosib o‘yin ko‘rsatib, faqat penaltilar seriyasida mag‘lub bo‘lganmiz. Hozir bizda juda yaxshi terma jamoa shakllangan. Buni, hatto, JCH saralashi Eronga qarshi bahsda ham ko‘rish mumkin. Bu musobaqa futbolchilar va muxlislar uchun yorqinroq bo‘lib o‘tadi deb o‘ylayman. Hozir muxlislarda ham bizga nisbatan ishonch bor.
Avval terma jamoada bir yoki ikki nafar yetakchi bo‘lardi. Shunaqa vaqtda ularning o‘yini o‘xshamasa, butun termaning o‘yini o‘xshamasdi va yutqazib qo‘yardik. Hozir-chi? Meni o‘yinim o‘xshamasa, boshqa bir futbolchining o‘yini o‘xshamasa, hamma, hattoki, zaxiradan tushgan futbolchi ham o‘yinni o‘zgartira oladi. Hozir bizda shunday terma jamoa yig‘ilganki, ba’zida, asosiy tarkibdan ko‘ra zaxiradagi futbolchilarning ta’siri kuchliroqdek ko‘rinadi.
Jaloliddin Masharipov, O‘zbekiston terma jamoasi sardori
Matbuot anjumanini video shaklida bu yerda ko‘rish mumkin.
Izoh (0)