O‘zbekistonda suvdan qarzdorlik salkam 940 mlrd so‘mni tashkil etmoqda

O‘zbekistonda ichimlik va oqova suv tarmoqlari bo‘yicha debitor qarzdorlik 938,7 milliard so‘m tashkil etmoqda.

Bu haqda AOKAda o‘tkazilgan brifingda “O‘zsuvta’minot” AJ axborot xizmati rahbari Akmal Murodov ma’lum qildi. Bunda jismoniy iste’molchilar qarzdorligi 757,3 milliard so‘mni tashkil etsa, 181,4 milliard so‘mlik qarzdorlik yuridik iste’molchilar hissasiga to‘g‘ri kelmoqda.

Bugungi kunga qadar debitor qarzdorlikni qisqartirish bo‘yicha sudlarga jami 33,4 ming ta 143,4 milliard so‘mlik da’vo arizalar kiritilgan. “O‘zsuvta’minot” AJ va hududiy korxonalari tomonidan o‘tgan davr mobaynida 76 ming marotabaga yaqin reyd tadbirlari o‘tkazildi. Ushbu reydlar davomida 12,7 ming ta qoidabuzarlik holatlari aniqlangan bo‘lib, jami 80,6 milliard so‘mlik zarar yetkazilgan.

Shuningdek, 8,7 ming ta holatda iste’molchilar tomonidan suv o‘lchagichdan foydalanish qoidalariga amal qilinmagani aniqlanib, 34,9 milliard so‘m zarar yetkazilgani aniqlandi.