Qoraqalpog‘istonda ichimlik suvi va oqova xizmatlar bo‘yicha yangi tariflar tasdiqlandi. Bu haqda “O‘zsuvta’minot” matbuot xizmati xabar berdi.
Ma’lum qilinishicha, o‘tgan uch yilda Qoraqalpog‘iston Respublikasida markazlashgan ichimlik suvi bilan ta’minlanish darajasi 61,5 foizdan 70,5 foizga, kanalizatsiya qamrovi 5,4 foizdan 5,6 foizga yetkazildi. Shuningdek, kelgusi 5 yilda markazlashgan ichimlik suvi bilan ta’minlanish darajasi 70,5 foizdan 89,7 foizga, kanalizatsiya qamrovi esa 5,6 foizdan 24,6 foizga yetkazilishi rejalashtirilgan.
Buning uchun barcha manbalar hisobidan 5,9 trillion so‘m evaziga, 3,192 kilometr ichimlik suvi va 438,6 kilometr kanalizatsiya tarmog‘i, shuningdek, 179 ta suv inshooti qurish va rekonstruksiya etilishi belgilangan. Bundan tashqari ish haqi, elektr energiyasi, soliq to‘lovlari, xorijiy kreditlar to‘lovi amalga oshirilgan bo‘lib, joriy va kapital ta’mirlash, tizimni modernizatsiya qilish ishlarida ham sarf-xarajatlar talab etiladi.
Yuqoridagilardan kelib chiqib, Jo‘qorg‘i Kenges tomonidan Qoraqalpog‘iston Respublikasida ichimlik suvi ta’minoti va oqova suv xizmatlari uchun yangi tariflar (narxlar) tasdiqlandi.
Unga ko‘ra, 2024-yilning 15-yanvaridan quyidagi belgilangan yangi tariflar amalda qo‘llanadi:
Ichimlik suvi:
- aholi uchun 1 metr kub — 2 900 so‘m;
- budjet tashkilotlari uchun 1 metr kub — 5 700 so‘m;
- ulgurji iste’molchilar uchun 1 metr kub — 5 700 so‘m.
Oqova suv xizmati:
- aholi uchun 1 metr kub — 1 400 so‘m;
- budjet tashkilotlari uchun 1 metr kub — 2 800 so‘m;
- ulgurji iste’molchilar uchun 1 metr kub — 2 800 so‘m.
Bundan avval Sirdaryo, Farg‘ona, Samarqand, Xorazm, Andijon, Qashqadaryo, Surxondaryo va Toshkent viloyatida ichimlik suvi va oqova xizmatlar bo‘yicha yangi tariflar tasdiqlangandi.
Izoh (0)