Germaniya kansleri Olaf Sholsning fikricha, Yevropa Ittifoqi davlatlari 1-fevraldagi sammitda Kiyevga to‘rt yil muddatga moliyaviy yordam ko‘rsatish bo‘yicha kelishib olishi mumkin. Bu haqda u Berlinda Lyuksemburg bosh vaziri Lyuk Friden bilan muzokaralardan so‘ng ma’lum qildi.
“Ishonchim komilki, biz 27 a’zo davlatning barchasi bilan bir qarorga kela olamiz. Biz bu borada juda jadal ishlayapmiz. Va buni amalga oshirish uchun katta kuch sarflayapmiz”, — dedi u.
2023-yil dekabrida bo‘lib o‘tgan sammitda Yevropa Ittifoqi davlatlari to‘rt yil davomida Ukrainaga 50 milliard yevro miqdoridagi moliyaviy yordam ajratish bo‘yicha qarorni qabul qila olmadi. Bu mablag‘larning 33 milliard yevrosi kredit, 17 milliard yevrosi esa grant shaklida yo‘naltirilishi kerak edi.
Ushbu yordam dasturini amalga oshirish uchun Yevropa Komissiyasi tarixda birinchi marta Yevropa Ittifoqi davlatlaridan budjetga qo‘shimcha badal to‘lashni so‘radi. 50 milliard yevroni 4 yilga bo‘lib hisoblaganda oyiga 1 milliard yevrodan sal ko‘proqni tashkil qiladi. 2023-yilda Ukraina Yevropa Ittifoqidan oyiga 1,5 milliard yevro olgan.
Yevropa Ittifoqi raisi Ursula fon der Lyayen 1-fevraldagi sammitda Yevropa Ittifoqining 27 davlati 50 milliard yevroni tasdiqlash bo‘yicha kelisha olmasa, Ukrainaga muqobil yordam loyihasini tayyorlanayotganini ma’lum qildi.
Izoh (0)