Германия канцлери Олаф Шольцнинг фикрича, Европа Иттифоқи давлатлари 1 февралдаги саммитда Киевга тўрт йил муддатга молиявий ёрдам кўрсатиш бўйича келишиб олиши мумкин. Бу ҳақда у Берлинда Люксембург бош вазири Люк Фриден билан музокаралардан сўнг маълум қилди.
“Ишончим комилки, биз 27 аъзо давлатнинг барчаси билан бир қарорга кела оламиз. Биз бу борада жуда жадал ишлаяпмиз. Ва буни амалга ошириш учун катта куч сарфлаяпмиз”, — деди у.
2023 йил декабрида бўлиб ўтган саммитда Европа Иттифоқи давлатлари тўрт йил давомида Украинага 50 миллиард евро миқдоридаги молиявий ёрдам ажратиш бўйича қарорни қабул қила олмади. Бу маблағларнинг 33 миллиард евроси кредит, 17 миллиард евроси эса грант шаклида йўналтирилиши керак эди.
Ушбу ёрдам дастурини амалга ошириш учун Европа Комиссияси тарихда биринчи марта Европа Иттифоқи давлатларидан бюджетга қўшимча бадал тўлашни сўради. 50 миллиард еврони 4 йилга бўлиб ҳисоблаганда ойига 1 миллиард евродан сал кўпроқни ташкил қилади. 2023 йилда Украина Европа Иттифоқидан ойига 1,5 миллиард евро олган.
Европа Иттифоқи раиси Урсула фон дер Ляйен 1 февралдаги саммитда Европа Иттифоқининг 27 давлати 50 миллиард еврони тасдиқлаш бўйича келиша олмаса, Украинага муқобил ёрдам лойиҳасини тайёрланаётганини маълум қилди.
Изоҳ (0)