AQSH Milliy Transport xavfsizligi kengashi (NTSB) 6-yanvar kuni Boeing 737-9 Max yo‘lovchi samolyotining favqulodda qo‘nishi bo‘yicha o‘tkazilgan tekshiruv natijalarini e’lon qildi.
Reuters agentligining xabar berishicha, Portlendda samolyotdan ajralib ketgan favqulodda chiqish eshigi lyuki topilgan. NTSB tergovchilari samolyot lyukining tambalangan qismi buzilgani voqeaga sabab bo‘lgan deb hisoblamoqda.
Agentlikning qayd etishicha, NTSB rahbari Jennifer Xomendi jurnalistlarga favqulodda qo‘nish tafsilotlarini aniqlash uchun samolyotning ajralib ketgan lyukini topish zarurligi haqida aytgan. Bugun, 8-yanvar kuni Bob ismli maktab o‘qituvchisi Portlend shahridagi uylardan birining orqa hovlisidan mazkur lyukni topgan.
Jennifer Xomendining taʼkidlashicha, hodisa yuzasidan maxsus guruh tekshiruv o‘tkazadi va samolyotning topilgan bo‘lagi bunga yordam beradi.
6-yanvar kuni Alaska Airlines aviakompaniyasining Portlenddan Ontarioga yo‘l olgan Boeing 737-9 Max yo‘lovchi samolyoti samolyotning favqulodda chiqish eshigining lyuki ajralib ketgandan so‘ng, aeroportga favqulodda qo‘nishni amalga oshirdi.
Voqeadan so‘ng Yevropa Ittifoqi va AQSH ushbu turdagi avialaynerlarni tekshiruvdan o‘tkazish uchun ularning parvozini to‘xtatganini e’lon qildi.
Izoh (0)