Eronning Kerman shahrida 3-yanvar kuni yuz bergan terakt qurbonlari soni 100 kishidan oshdi. Bu haqda favqulodda xizmatlarga tayanib, Young Journalists Club agentligi xabar berdi.
Portlash Qosim Sulaymoniy o‘limining to‘rt yilligi xotirasiga bag‘ishlangan dafn marosimi chog‘ida sodir bo‘lgan. Terakt Sulaymoniy dafn etilgan qabriston yaqinida yuz bergan. Eronlik jurnalistlar portlovchi qurilmalar masofadan turib boshqarilganini aytmoqda.
“Kerman favqulodda xizmati rahbarining aytishicha, qabristonga olib boruvchi yo‘lda sodir bo‘lgan terakt oqibatida qurbonlar soni 103 nafarga yetgan. Jarohatlanganlari soni 141 nafarni tashkil etmoqda, baʼzilarining ahvoli og‘ir”, — deyiladi xabarda.
Mahalliy hukumat voqeani terakt deb atagan. Eron Bosh prokuraturasi Qosim Sulaymoniy qabri yonidagi terakt bo‘yicha tergov boshlagan.
AQSH 2020-yil 3-yanvarga o‘tar kechasi Islom inqilobi qo‘riqchilari korpusining maxsus kuchlari qo‘mondoni Qosim Sulaymoniy va Iroq shia militsiyasi rahbari o‘rinbosari Abu Mahdi al-Muhandisni yo‘q qilish bo‘yicha operatsiya o‘tkazgandi. Ular 2019-yil 31-dekabr kuni Bag‘doddagi Amerika elchixonasiga hujum uyushtirishga aloqadorlikda ayblangan.
Bunga javoban Eron Amerikaning Iroqdagi bazalariga, jumladan, Ayn al-Asadga zarba bergan. Dastlab AQSHning o‘sha paytdagi prezidenti Donald Tramp va Pentagon rasmiylari hujumdan keyin qurbonlar yo‘qligini ma’lum qilgandi. Keyin harbiylar yaradorlar borligini tan olishga majbur bo‘lgan. Shundan keyin ularning soni doimiy ravishda o‘sib borgan.
Izoh (0)