Eron hukumati 13-avgust kuni Sherozdagi Shoh Cherax maqbarasiga uyushtirgan hujum sababli Tojikiston fuqarosi Rahmatullo Navro‘zovni o‘lim jazosiga hukm qildi. Bu haqda Anadolu xabar berdi.
Hujumning yana ikki nafar ayblanuvchisi besh yillik qamoq jazosiga hukm qilingan. Erondagi eng yirik beshta shia ziyoratgohidan biri bo‘lgan Shoh Cheraxga uyushtirilgan hujum oqibatida ikki kishi halok bo‘lgan, yetti kishi yaralangan.
Fors viloyati bosh prokurori Said Kozim Musaviyning xabar berishicha, Rahmatullo Navro‘zov “ikki marta o‘limga hukm qilingan”. Tergov davomida ayblanuvchi “Islom davlati” terrorchilik guruhiga aʼzoligini va ular bilan hamkorlik qilganini tan olgan.
Tojikiston huquq-tartibot idoralari hozircha bu faktga izoh bermagan. Fors viloyati rasmiylari Shoh Cherax masjidiga qilingan hujumga “boshqa terrorchilarning qatl etilgani uchun qasos” bo‘lishi mumkinligini istisno etmayapti. Ushbu hujumda 13 kishi halok bo‘lgan, yana 27 kishi yaralangandi.
Birinchi sud majlisida Navro‘zovning o‘zi so‘roqqa tutilgandi. U ISHIDga ijtimoiy tarmoqlar orqali qo‘shilganini aytgan. Unga Turkiyaga borishni buyurishgan. Turkiyadan noqonuniy ravishda Eronga, so‘ngra Pokistonga, u yerdan Afg‘onistonga kirib, jangarilar lagerida harbiy tayyorgarlikdan o‘tgan.
Navro‘zovning so‘zlariga ko‘ra, ISHID emissarlari unga masjidga o‘t qo‘yish va dindorlarni otib tashlashni buyurgan. Oqibatda u masjidga benzin bilan kelgan, biroq gilamlarga o‘t qo‘yishga ulgurmay qo‘lga olingan. U oldida bo‘lgan avtomat bilan o‘tkinchilarga 11 marta o‘q uzgan. Oqibatda ikki kishining o‘limiga va yana yetti kishining yaralanishiga sabab bo‘lgan.
ISHID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)