Eronning Kermon shahrida general Qosim Sulaymoniy dafn etilgan qabristonga olib boruvchi yo‘lda portlash sodir bo‘ldi. Bu haqda IRNA xabar berdi.
Xabarga ko‘ra, portlash oqibatida halok bo‘lganlar soni 50 kishiga yetgan, yaradorlar ham bor. Ularning soni ortishi kutilmoqda. Mahalliy hokimiyat hodisani terakt deb baholagan.
Bugun (3-yanvar kuni) Eron milliy xavfsizlik oliy kengashi favqulodda yig‘ilishdan so‘ng Sulaymoniyning o‘ldirilishini AQSHning eng katta strategik xatosi deb atagandi. Tehron Vashingtonga “kerakli vaqtda kerakli joyda” qasos olishga va’da bergandi.
2020-yil 3-yanvarga o‘tar kechasi AQSH Islom inqilobi qo‘riqchilari korpusining maxsus kuchlari qo‘mondoni Qosim Sulaymoniy va Iroq shia militsiyasi rahbari o‘rinbosari Abu Mahdi al-Muhandisni yo‘q qilish bo‘yicha operatsiya o‘tkazgandi.
Ular 2019-yil 31-dekabr kuni Bag‘doddagi Amerika elchixonasiga hujum uyushtirishga aloqadorlikda ayblangan. Bunga javoban Eron Amerikaning Iroqdagi bazalariga, jumladan, Ayn al-Asadga zarba bergan. Dastlab AQSHning o‘sha paytdagi prezidenti Donald Tramp va Pentagon rasmiylari hujumdan keyin qurbonlar yo‘qligini ma’lum qilgandi. Keyin harbiylar yaradorlar borligini tan olishga majbur bo‘lgan. Shundan keyin ularning soni doimiy ravishda o‘sib borgan.
Izoh (0)