Эроннинг Керман шаҳрида 3 январь куни юз берган теракт қурбонлари сони 100 кишидан ошди. Бу ҳақда фавқулодда хизматларга таяниб, Young Journalists Club агентлиги хабар берди.
Портлаш Қосим Сулаймоний ўлимининг тўрт йиллиги хотирасига бағишланган дафн маросими чоғида содир бўлган. Теракт Сулаймоний дафн этилган қабристон яқинида юз берган. Эронлик журналистлар портловчи қурилмалар масофадан туриб бошқарилганини айтмоқда.
“Керман фавқулодда хизмати раҳбарининг айтишича, қабристонга олиб борувчи йўлда содир бўлган теракт оқибатида қурбонлар сони 103 нафарга етган. Жароҳатланганлари сони 141 нафарни ташкил этмоқда, баъзиларининг аҳволи оғир”, — дейилади хабарда.
Маҳаллий ҳукумат воқеани теракт деб атаган. Эрон Бош прокуратураси Қосим Сулаймоний қабри ёнидаги теракт бўйича тергов бошлаган.
АҚШ 2020 йил 3 январга ўтар кечаси Ислом инқилоби қўриқчилари корпусининг махсус кучлари қўмондони Қосим Сулаймоний ва Ироқ шиа милицияси раҳбари ўринбосари Абу Маҳди ал-Муҳандисни йўқ қилиш бўйича операция ўтказганди. Улар 2019 йил 31 декабрь куни Бағдоддаги Америка элчихонасига ҳужум уюштиришга алоқадорликда айбланган.
Бунга жавобан Эрон Американинг Ироқдаги базаларига, жумладан, Айн ал-Асадга зарба берган. Дастлаб АҚШнинг ўша пайтдаги президенти Дональд Трамп ва Пентагон расмийлари ҳужумдан кейин қурбонлар йўқлигини маълум қилганди. Кейин ҳарбийлар ярадорлар борлигини тан олишга мажбур бўлган. Шундан кейин уларнинг сони доимий равишда ўсиб борган.
Изоҳ (0)