Tehron va Bag‘dod Eron generali Sulaymoniy va Iroqning terrorizmga qarshi kurash bo‘yicha yuqori martabali qo‘mondonlarining o‘ldirilishida aybdorlarni jinoiy javobgarlikka tortish yuzasidan qo‘shma bayonotni imzoladi. Bu haqda Eron sud tizimining yuqori martabali mulozimiga tayanib, Iran.ru xabar berdi.
Eron sud tizimi Inson huquqlari kengashi kotibi va sudyaning xalqaro ishlar bo‘yicha o‘rinbosari Kozim G‘aribobodiyning aytishicha, 23-dekabr kuni Eron va Iroq terrorizmga qarshi kurash yetakchilari general-leytenant Qosim Sulaymoniy va iroqlik Abu Mahdi al-Muhandisning o‘ldirilishini tergov qilish uchun tuzilgan qo‘shma qo‘mitaning ikkinchi yig‘ilishida qo‘shma bayonotni imzolagan.
G‘aribobodiy 21-dekabr kuni Tehronda bo‘lib turgan Iroq adliya vaziri Salar Abdul Sattor Muhammad bilan uchrashgan.
U shuningdek, Eron va Iroq ikkala tomon 2020-yilning boshida Bag‘dod aeroporti yaqinida general Sulaymoniyning o‘ldirilishi bo‘yicha AQShning jinoiy harakati bilan bog‘liq tergov hujjatlari va har qanday ma’lumot almashishni davom ettirishga kelishib olganini aytdi.
Xabar qilinishicha, Eron rasmiy vakili Tehronga kelgan Iroq adliya delegatsiyasi bilan uchrashuv chog‘ida general Sulaymoniy va Iroqning terrorizmga qarshi kurash bo‘yicha yuqori martabali qo‘mondonlarining o‘ldirilishida aybdorlarni aniqlash va jinoiy javobgarlikka tortish zarurligini ta’kidlagan.
Eslatib o‘tamiz, Eron Islom inqilobi muhofizlari korpusi (IIMK) generali Qosim Sulaymoniy 2020-yil 3-yanvar kuni AQSh havo kuchlari tomonidan Bag‘dod aeroportiga berilgan aviahujum oqibatida o‘ldirilgandi. Zarba AQShning o‘sha paytdagi prezidenti Donald Tramp farmoyishiga asosan berilgan.
Tramp IIMKni terrorchilik tashkiloti deb hisoblagan va Qosim Sulaymoniyni mintaqada, xususan, Iroqda bo‘lib turgan amerikalik diplomatlar va harbiylarga hujum qilishni rejalashtirganlikda ayblagan. Eron esa unga javoban Iroqdagi Amerika bazasiga hujum qilgan. Buning oqibatida 100 dan ortiq amerikalik jarohatlangandi.
Eron Sulaymoniyning o‘limi uchun AQShdan qasos olish hali yakunlanmaganini eslatib o‘tgani haqida xabar berilgan edi. “Al-Quds” komandiri o‘rinbosari general Muhammad Hijoziy “Bu shunchaki yuzga tarsaki tortishdek gap edi, haqiqiy qasos hali oldinda”, deb aytgan.
Izoh (0)