Toshkent viloyati hokimligi Toshkent tumanida joylashgan xonadonlarning birida sodir bo‘lgan yong‘in yuzasidan ma’lumot berdi.
Ma’lum qilinishicha, 1-yanvar kuni soat 18:18 da Toshkent tumani “Oltintepa” mahallasi Zabardast-5 ko‘chasida joylashgan 11-uyda yong‘in sodir bo‘layotgani haqida xabar kelib tushgan.
Xabarga asosan yong‘in joyiga 4 ta yong‘in o‘chirish ekipaji jalb etilgan. Ekipajlar soat 18:21 da yetib borgan. Yong‘in 70 kvadrat metr maydonga tarqalgan.
Qutqaruvchilarning saʼy- harakatlari natijasida yong‘in soat 18:45 da o‘rab olinib, soat 19:25 da o‘chirilgan. Xonadonning 150 kvadrat metr maydoni yong‘indan saqlab qolingan.
“Yong‘in sababi va zarari aniqlanmoqda. Yong‘in oqibatidan halok bo‘lgan va tan jarohati olganlar yo‘q, uyning tom qismi va romlari butun qolgan. Hozirgi vaqtda yong‘in oqibatlarini bartaraf qilish maqsadida mahalla aholisi, qo‘ni-qo‘shnilar tomonidan hashar ishlari o‘tkazilmoqda”, — deyiladi xabarda.
Eslatib o‘tamiz, 14-oktyabr kuni Toshkent shahar Mirobod tumanida joylashgan qurilish binosida yong‘in sodir bo‘lgandi. Undan oldinroq esa Navoiy viloyati Uchquduq tumanida joylashgan sport majmuasida yirik yong‘in yuz bergani to‘g‘risida xabar berilgan edi.
Izoh (0)