Bolalar ombudsmani Surayyo Rahmonova Qashqadaryoda 7 oy davomida jinsiy ekspluatatsiya qurboniga aylangan 14 yoshli qiz holidan xabar oldi.
Voyaga yetmagan Ch.T. 2023-yilning may oyidan 15-noyabrigacha Shahrisabz tumanida yashovchi fuqaro N.A. tomonidan 7 oy davomida tahdid orqali jinsiy ekspluatatsiya qurboniga aylangandi.
Surayyo Rahmonova qiz bilan uchrashib, unga ko‘rsatilayotgan ijtimoiy ko‘mak, ta’lim shart-sharoitlari hamda emotsional-psixologik yordam holatini o‘rgandi.
Qayd etilishicha, qizning hozirda ahvoli ancha yaxshilanib, barqarorlashgan, psixolog tomonidan unga muntazam ko‘mak ko‘rsatilmoqda. Shuningdek, pedagoglar jalb qilingan holda bolaga maktab dasturidagi asosiy fanlardan darslar o‘tilmoqda.
“Jumladan, Ch.T. ingliz tili va kompyuter savodxonligiga katta ishtiyoq ko‘rsatyapti, tasviriy san’atga esa alohida qobiliyati bor. Samimiy suhbatimiz davomida qizcha kelgusidagi rejalari bilan bo‘lishdi, eng asosiy maqsadi — ta’lim olib, huquqni muhofaza qilish sohasining yetuk mutaxassisi bo‘lishga intilishini bildirdi”, — deyiladi bolalar ombudsmani xabarida.
Ta’kidlanishicha, bolalar ombudsmani bunday mudhish jinoyat qurboni bo‘lgan bolaning har tomonlama reabilitatsiyasi, o‘z tengdoshlari doirasida normal ijtimoiylashuvi va eng muhimi, ta’lim olish imkoniyatlari ta’minlanishi ustidan o‘z kuzatuvini davom ettiradi.
Eslatib o‘tamiz, mazkur jinoyat bo‘yicha Jinoyat kodeksining 135-moddasi 3-qismi “a” bandi bo‘yicha jinoyat ishi qo‘zg‘atilgan bo‘lib, hozirda Kitob tuman IIB huzuridagi Tergov guruhi tomonidan dastlabki tergov harakatlari olib borilmoqda.
Izoh (0)