Venesuela rahbari Nikolas Maduro qo‘shni Gayana hududining bir qismini anneksiya qilish niyatini e’lon qilganidan so‘ng, Braziliya Venesuela bilan chegarasiga qo‘shimcha qo‘shinlar joylashtirishini bildirdi. Bu haqda BBC xabar berdi.
Bungacha Venesuela hukumati referendum o‘tkazgandi, unda ovoz berishda qatnashganlarning 95 foizi Gayanaga tegishli bo‘lgan Gayana-Essekibo hududi Venesuela tarkibiga kirishini yoqlagan. Shundan so‘ng Nikolas Maduro qonun chiqaruvchi organga Venesuela tarkibida yangi shtat yaratish haqidagi qonunni qabul qilishni taklif bergan. U butun Gayana-Essekibo bo‘ylab neft va gaz konlarini qidirish va foydalanish uchun litsenziyalar berishni boshlashga va’da bergan. Shuningdek, Maduro chet el kompaniyalariga Gayana dengiz shleyfida qazib olishni to‘xtatishni talab qilgan.
Bunga javoban Gayana o‘z qo‘shinlarini shay holatga keltirgan va BMT Xavfsizlik kengashidan butun mintaqani beqarorlashtirish tahdidi ostida bo‘lgan vaziyatga aralashishni so‘ragan. Braziliya armiyasi chegaradagi Rorayma shtatiga qo‘shimcha askar va texnika yig‘moqda. Agar Venesuela Gayana-Essekiboga harbiy bostirib kirishga qaror qilsa, bu faqat Braziliya hududi orqali amalga oshiriladi. Venesuela va Gayananing to‘g‘ridan to‘g‘ri chegaradosh hududlarida landshaft tufayli qo‘shinlarning harakatlanishi deyarli ilojsiz.
Braziliya qo‘mondonligi mamlakat mojaroga tortilmasligi uchun mintaqadagi ishtirokini kuchaytirayotganini ma’lum qildi.
Izoh (0)