Venesuela qo‘shni Gayana hududining uchdan ikki qismiga egalik huquqini da’vo qilganidan so‘ng, Gayana hukumati Birlashgan Millatlar Tashkilotiga murojaat qildi va AQSHdan yordam so‘radi.
The Guardian nashrining yozishicha, Venesuela prezidenti Nikolas Maduro Gayana hududining uchdan ikki qismini tashkil etuvchi 159,5 ming km² maydonni egallagan Essekiboni qo‘shib olish choralarini ko‘rishni buyurganidan keyin Gayana BMT va AQSHga yordam so‘rab murojaat qilgan.
3-dekabr kuni venesuelaliklar referendumda Essekiboning anneksiya qilinishini ma’qullagan edi.
“BMT Bosh kotibi va bir qancha milliy yetakchilar bilan gaplashdim. Men ularni prezident Maduroning xavfli tendensiyalari va puch harakatlari haqida ogohlantirdim”, —dedi Gayana prezidenti Irfaan Ali mamlakat xalqiga telemurojaatida.
Shu bilan birga, Nikolas Maduro Venesuela fuqarolari tomonidan qabul qilingan qarorga muvofiq, Essekiboni qo‘shib olish uchun “choralar ko‘rishini” aytdi. Maduroning so‘zlariga ko‘ra, u Gayanada yangi shtat yaratish va Essekibo aholisiga Venesuelaning shaxsiy guvohnomalarini berish to‘g‘risidagi qonunni qabul qilishni buyurgan. Shuningdek, u milliy neft kompaniyalariga neftga boy mintaqadan energiya resurslarini qazib olishni boshlash haqida ko‘rsatma berdi.
Ammo Gayana va qo‘shni davlatlarni eng tashvishga solayotgan narsa Maduroning navbatdagi buyrug‘i: Venesuela prezidenti Essekiboda “maxsus harbiy qism” tashkil etishni buyurgan. Gayana va Venesuela bilan chegaradosh Braziliya allaqachon chegara hududlariga zirhli texnikalarini yuborgan. Maduroning Essekiboni anneksiya qilishga urinishi Janubiy Amerikada urushga olib kelishi mumkin degan xavotirlar bor.
Essekibo minerallarga boy hudud bo‘lib, hozirda Gayanaga qaraydi. Gayana chegaralari 1899-yilda o‘rnatilgan, ammo Venesuela buni rasman tan olmagan va Essekiboni o‘zining tarixiy hududi deb biladi.
Izoh (0)