Венесуэла раҳбари Николас Мадуро қўшни Гаяна ҳудудининг бир қисмини аннексия қилиш ниятини эълон қилганидан сўнг, Бразилия Венесуэла билан чегарасига қўшимча қўшинлар жойлаштиришини билдирди. Бу ҳақда BBC хабар берди.
Бунгача Венесуэла ҳукумати референдум ўтказганди, унда овоз беришда қатнашганларнинг 95 фоизи Гаянага тегишли бўлган Гаяна-Эссекибо ҳудуди Венесуэла таркибига киришини ёқлаган. Шундан сўнг Николас Мадуро қонун чиқарувчи органга Венесуэла таркибида янги штат яратиш ҳақидаги қонунни қабул қилишни таклиф берган. У бутун Гаяна-Эссекибо бўйлаб нефть ва газ конларини қидириш ва фойдаланиш учун лицензиялар беришни бошлашга ваъда берган. Шунингдек, Мадуро чет эл компанияларига Гаяна денгиз шлейфида қазиб олишни тўхтатишни талаб қилган.
Бунга жавобан Гаяна ўз қўшинларини шай ҳолатга келтирган ва БМТ Хавфсизлик кенгашидан бутун минтақани беқарорлаштириш таҳдиди остида бўлган вазиятга аралашишни сўраган. Бразилия армияси чегарадаги Рорайма штатига қўшимча аскар ва техника йиғмоқда. Агар Венесуэла Гаяна-Эссекибога ҳарбий бостириб киришга қарор қилса, бу фақат Бразилия ҳудуди орқали амалга оширилади. Венесуэла ва Гаянанинг тўғридан тўғри чегарадош ҳудудларида ландшафт туфайли қўшинларнинг ҳаракатланиши деярли иложсиз.
Бразилия қўмондонлиги мамлакат можарога тортилмаслиги учун минтақадаги иштирокини кучайтираётганини маълум қилди.
Изоҳ (0)