Venesuelada 3-dekabr, yakshanba kuni referendum bo‘lib o‘tdi, unda ishtirokchilarning 95 foizi neftga boy Essekibo hududini mamlakatning shimoli-sharqiy qismiga kiritishni ma’qulladi, deb yozadi The New York Times mamlakat saylov komissiyasiga tayanib.
Xuddi shu nomdagi daryoning g‘arbiy qismida joylashgan Essekibo umumiy maydoni 160 ming kvadrat kilometr bo‘lib, u Gayana davlatining to‘rtdan uch qismini egallaydi va hozir ushbu mamlakat boshqaruvi ostida. XIX asr boshidan buyon ikki davlat bu hududga egalik ustida bahslashib keladi.
Venesuela Milliy saylov kengashi prezidenti Elvis Amoroso maslahat referendumida 10,5 milliondan ortiq fuqaro ishtirok etganini ma’lum qildi, deb xabar beradi El Universal (mamlakat aholisi 28 millionga yaqin).
Ovoz berish uchun beshta savol qo‘yildi, ularning oxirgisi quyidagicha: “Siz Gayana-Essekibo shtatining tashkil etilishiga, ushbu hududning hozirgi va kelajakdagi aholisiga Jeneva konvensiyasiga muvofiq fuqarolik va Venesuela shaxsiy guvohnomasini taqdim etishni o‘z ichiga olgan kompleks xizmatlarning tezkor rejasi ishlab chiqilishiga rozimisiz?” Ishtirokchilarning 95,93 foizi “ha”, 4,07 foizi “yo‘q” ovozini bergan.
Referendum tashabbuskori prezident Nikolas Maduro bo‘lib, u ovoz berish natijalarini “demokratiya uchun to‘liq muvaffaqiyat” deb atadi. U Karakas Essekiboni qo‘shib olish bo‘yicha biror chora ko‘radimi yoki yo‘qligiga aniqlik kiritmadi.
Gayana prezidenti Irfaan Ali Essekiboning “har bir kvadrat dyuymi” uning mamlakatiga tegishli ekanini aytdi va hududni himoya qilishga va’da berdi. Rasmiylar Xalqaro suddan Venesuelaning mintaqani kuch bilan bosib olishi xavfi tufayli referendumni to‘xtatishni so‘ragan. Sud Karakasni Gayana bilan hududiy bahsdagi vaziyatni yomonlashtiradigan harakatlardan tiyilishni buyurgan, biroq ovoz berishni taqiqlash haqida gap bo‘lmagan.
Izoh (0)