Tashqi mehnat migratsiyasi agentligi Krasnodardagi mehnat migrantlari ishtirokida yuz bergan mushtlashuv yuzasidan ma’lumot berdi.
Ijtimoiy tarmoqlarda Rossiyaning Krasnodar shahrida o‘zbekistonlik mehnat migrantlari ishtirokida mushtlashuv yuz bergani haqida xabarlar tarqaldi.
Dastlabki maʼlumotlarga ko‘ra, mazkur holat joriy yil 25-noyabr kuni Krasnodar shahrida joylashgan “Tochno” korxonasining qurilish obyektda sodir bo‘lgan. Korxonaga tegishli qurilish kranidan foydalanish masalasida o‘zaro kelishmovchilik oqibatida ushbu korxonada mehnat faoliyatini olib borayotgan 50 nafardan ortiq O‘zbekiston fuqarosi o‘rtasida janjal kelib chiqqan.
Hozirgi vaqtda Tashqi mehnat migratsiyasi agentligining Rossiya vakolatxonasi xodimlari tomonidan korxona rahbariyati va huquq-tartibot organlari bilan hamkorlikda tomonlarni o‘zaro kelishtirgan holda javobgarlikka tortmasdan hal qilish choralari ko‘rilmoqda.
Eslatib o‘tamiz, 2019-yilda Moskvada O‘zbekiston fuqarolari ishtirokida ommaviy mushtlashuv yuz bergan edi. Shuningdek, Samarqanddagi qurilishda Turkiya va O‘zbekiston fuqarolari o‘rtasida ommaviy mushtlashuv yuzaga kelgan edi. 2021-yilda esa Sankt-Peterburgda o‘zbekistonliklar ishtirokida mushtlashuv sodir bo‘lgandi.
Izoh (0)