Sankt-Peterburg markazida O‘zbekiston fuqarolari bir ayol sabab mushtlashdi. Bu haqda Rossiya Ichki ishlar vazirligining Sankt-Peterburg va Leningrad viloyati bo‘yicha bosh boshqarmasi matbuot xizmati xabar berdi.
Ma’lumotlarga ko‘ra, ommaviy mushtlashuv 17-oktyabrga o‘tar kechasi Dostoyevskiy ko‘chasida sodir bo‘lgan. “Kattaqo‘rg‘on” kafesi yaqinida mojaro boshlangani haqidagi xabar kelib tushganidan so‘ng u yerga politsiya yetib borgan.
Huquq-tartibot idoralari xodimlari tomonidan ichki ishlar bo‘limiga 23 yoshdan 42 yoshgacha bo‘lgan 12 nafar O‘zbekiston fuqarosi, jumladan, sartarosh bo‘lib ishlayotgan 34 yoshli ayol olib ketilgan. Aniqlanishicha, aynan u tufayli ko‘chada janjal kelib chiqqan bo‘lib, oqibatda ikki kishi yopiq bosh jarohati, miya chayqalishi va ko‘plab ko‘karishlar bilan shifoxonaga yotqizilgan.
Hibsga olinganlarga nisbatan migratsiya qonunchiligini buzganlik uchun 6 ta, mayda bezorilik uchun 8 ta bayonnoma tuzilgan. Bundan tashqari, tekshiruv natijalariga ko‘ra jinoyat ishi qo‘zg‘atilgan. Mojaroning to‘rt ishtirokchisi bezorilikda gumon qilinmoqda.
Eslatib o‘tamiz, 2019-yilda Moskvada O‘zbekiston fuqarolari ishtirokida ommaviy mushtlashuv yuz bergan edi. Shuningdek, Samarqanddagi qurilishda Turkiya va O‘zbekiston fuqarolari o‘rtasida ommaviy mushtlashuv yuzaga kelgan edi. 2021-yilda esa Sankt-Peterburgda o‘zbekistonliklar ishtirokida mushtlashuv sodir bo‘lgandi.
Izoh (0)