Ташқи меҳнат миграцияси агентлиги Краснодардаги меҳнат мигрантлари иштирокида юз берган муштлашув юзасидан маълумот берди.
Ижтимоий тармоқларда Россиянинг Краснодар шаҳрида ўзбекистонлик меҳнат мигрантлари иштирокида муштлашув юз бергани ҳақида хабарлар тарқалди.
Дастлабки маълумотларга кўра, мазкур ҳолат жорий йил 25 ноябрь куни Краснодар шаҳрида жойлашган “Точно” корхонасининг қурилиш объектда содир бўлган. Корхонага тегишли қурилиш кранидан фойдаланиш масаласида ўзаро келишмовчилик оқибатида ушбу корхонада меҳнат фаолиятини олиб бораётган 50 нафардан ортиқ Ўзбекистон фуқароси ўртасида жанжал келиб чиққан.
Ҳозирги вақтда Ташқи меҳнат миграцияси агентлигининг Россия ваколатхонаси ходимлари томонидан корхона раҳбарияти ва ҳуқуқ-тартибот органлари билан ҳамкорликда томонларни ўзаро келиштирган ҳолда жавобгарликка тортмасдан ҳал қилиш чоралари кўрилмоқда.
Эслатиб ўтамиз, 2019 йилда Москвада Ўзбекистон фуқаролари иштирокида оммавий муштлашув юз берган эди. Шунингдек, Самарқанддаги қурилишда Туркия ва Ўзбекистон фуқаролари ўртасида оммавий муштлашув юзага келган эди. 2021 йилда эса Санкт-Петербургда ўзбекистонликлар иштирокида муштлашув содир бўлганди.
Изоҳ (0)