Ko‘z yoshlar, hayajon va jo‘r bo‘lib kuylangan xit qo‘shiqlar: Turkiyalik xonanda va kompozitor Jem Adrian Toshkentda konsert berdi (video)

25-noyabr kuni zamonaviy turk estradasining sevimli yulduzi Jem Adrian jonli ijrodagi konsert dasturi bilan Toshkentga keldi. Turkcha suhbatlar, hazillar va jonli ijrodagi birga kuylangan qo‘shiqlar bilan o‘tgan shouda “Chinor ostidagi duel” filmi rejissori Rashid Malikov va o‘zbek shou-biznesining boshqa taniqli vakillari ham tomoshabin sifatida ishtirok etdi.



Dastur davomida Jem Adrian jamoasi Toshkentga bir kunlik tashrif, aslida buncha ko‘p muxlislar uchun oz ekanini aytdi va kelasi safar katta tayyorgarlik bilan yana qaytishini ta’kidladi.

“Aslida hozir bir vaqtning o‘zida Toshkentda uchta mashhur san’atkorning konserti bo‘lyapti, lekin ular orasida Jem Adrian boshqa! Uning qo‘shiqlari insonning ich-ichigacha kirib, shunday titratib yuboradiki, barcha tashvishlarni unutish va 100 yilda bir tug‘iladigan bunday ijodkorni tinglash uchun keldim”,— deydi muxlislardan biri.

Ma’lumot uchun, kompozitor, xonanda, prodyuser Jem Adrian 1980-yilning 30-noyabr kuni Turkiyaning Edirna shahrida tug‘ilgan. U basdan soprano diapazonigacha kuylay olish qobiliyati bilan tanilgan, uning ovoz boylamlari odatdagidan uch baravar uzunroq hisoblanadi.

Quyida ushbu jonli ijrodagi konsertdan “Daryo” tayyorlagan maxsus reportajni tomosha qiling.