Кўз ёшлар, ҳаяжон ва жўр бўлиб куйланган хит қўшиқлар: Туркиялик хонанда ва композитор Жем Адриан Тошкентда концерт берди (видео)

25 ноябрь куни замонавий турк эстрадасининг севимли юлдузи Жем Адриан жонли ижродаги концерт дастури билан Тошкентга келди. Туркча суҳбатлар, ҳазиллар ва жонли ижродаги бирга куйланган қўшиқлар билан ўтган шоуда “Чинор остидаги дуэль” фильми режиссёри Рашид Маликов ва ўзбек шоу-бизнесининг бошқа таниқли вакиллари ҳам томошабин сифатида иштирок этди.



Дастур давомида Жем Адриан жамоаси Тошкентга бир кунлик ташриф, аслида бунча кўп мухлислар учун оз эканини айтди ва келаси сафар катта тайёргарлик билан яна қайтишини таъкидлади.

“Аслида ҳозир бир вақтнинг ўзида Тошкентда учта машҳур санъаткорнинг концерти бўляпти, лекин улар орасида Жем Адриан бошқа! Унинг қўшиқлари инсоннинг ич-ичигача кириб, шундай титратиб юборадики, барча ташвишларни унутиш ва 100 йилда бир туғиладиган бундай ижодкорни тинглаш учун келдим”,— дейди мухлислардан бири.

Маълумот учун, композитор, хонанда, продюсер Жем Адриан 1980 йилнинг 30 ноябрь куни Туркиянинг Эдирна шаҳрида туғилган. У басдан сопрано диапазонигача куйлай олиш қобилияти билан танилган, унинг овоз бойламлари одатдагидан уч баравар узунроқ ҳисобланади.

Қуйида ушбу жонли ижродаги концертдан “Дарё” тайёрлаган махсус репортажни томоша қилинг.