O‘zbekistonning birinchi prezidenti Islom Karimovning nevarasi, Insta-bloger Maryam Tillayeva jurnalist Kiril Altmanga bergan intervyusida bobosi haqida xotiralari, hozirgi shaxsiy hayoti, ota-onasi bilan munosabatlari hamda kelajak rejalari xususida so‘zlab berdi.
“Hech qachon o‘zbekistonlik yigit bilan uchrashmayman, derdim”
— Hozirgi yigitim o‘zbek. U o‘zbekistonlik. Men hech qachon o‘zbekistonlik yigit bilan uchrashmayman, derdim. Chunki men Yevropada o‘sganman va mentalitetimiz farq qiladi, derdim. U boyvachchaning bolasi emas. Juda ko‘p ishlaydi, u g‘irt o‘zbekcha gapiradi, shuning uchun rus tilida biroz aksent bilan gapiradi. Shuning uchun men hozir o‘zbekchani o‘rganishga harakat qilyapman. U bilan o‘zimni juda ham xotirjam his etaman. U bilan tengdoshmiz, mendan 10 kunlik katta. Uning oyligi men Instagram’da topadigan bir kunlik reklama pulimdan kamroq. Lekin bu juda katta ahamiyatga ega emas. Men Nyu-Yorkda bo‘lgan paytim, u har kuni menga guldasta jo‘natdi, bu juda yoqimli edi. O‘zbekistonda mazam qochganida soat 3 da kelib meni shifokorga olib bordi. Bu narsalar puldan ham muhimroq.
Biznesi haqida
— Men hozir o‘z kosmetika liniyamni sotuvga chiqarishga tayyorlayapman. Bu ishni juda oson deb o‘ylagan ekanman. Lekin Yevropadagi zavod va yetkazib beruvchilar bilan muammolar chiqyapti. Shularni hal etish bilan bandman.
Ota-onasi bilan qanday munosabatda ekanligi haqida
— Ota-onam bilan hozir munosabatlarimiz salom-alikdan nariga o‘tmayapti. Bir-birimizni bayramlar, tug‘ilgan kunlar bilan tabriklaymiz, bo‘ldi. Boshqa gaplashmaymiz. Men Amiranga turmushga chiqqanimdan so‘ng ular bilan munosabatlarimiz yomonlashgan. Hozir oxirigacha yarashganimiz yo‘q. Ular boshidanoq Amiranga tegishimga qarshi bo‘lishgan. Ukam 18, singlim esa 13 yoshga to‘ladi, ular bilan birga emasman, bu vaqtni esa ortga qaytarib bo‘lmaydi. Yaqinda otamni tug‘ilgan kuni bilan tabrikladim, u SMS’imga hatto javob ham bermadi. Men bu gaplarim bilan ota-onamni yomonlamoqchi emasman. Shunchaki hozir bizning munosabatlarimizda tanaffus.
Buvisi haqida
— Amiran mening yalang‘och rasmimni tarqatib yuborganida buvim unga telefon qilib, “Oilamizni sharmanda qilyapsan”, degan. Shundan keyin Amiran suratni sahifasidan o‘chirib tashlagan.
Aslida buvim juda ham dono inson. Men munosabatlarda buvimga o‘xshashni juda ham xohlardim. Aytgancha, bobom har safar dasturxonga o‘tirayotganimizda “Agar rafiqam bo‘lmaganida men hech qachon prezident bo‘lmasdim”, derdi. U buvimni juda hurmat qilardi. Buvim qiyin damlarda meni har tomonlama qo‘llab-quvvatladi. U bilan ayniqsa Amiran bilan turmush qurganimizdan keyin yaqinlashib ketganmiz. Biz nevaralar uni kichkinaligimizdan oyi deb chaqiramiz. Sababi mening xolavachcham Islom bolaligida onasi buvimni oyi, deb chaqirayotganini eshitib, u ham buvimni oyilab ketgan. Shundan so‘ng biz ham u kabi buvimni oyi deb chaqiramiz. Buvim Moskvada bitta o‘zim qolib ketganimda menga yordam qo‘lini cho‘zdi. U haqiqiy birinchi xonim. Mana masalan, men o‘z xonamga kirganimda kiyimlarimni hamma yoqqa uloqtirib tashlashim mumkin. Buvim esa doimo xonasini toza, ozoda saqlaydi, hamma narsani joy-joyiga qo‘yadi. Ovqatlanayotganida ham o‘zini haqiqiy birinchi xonimlardek tutadi. U tabiatan o‘ta tartibli, og‘ir-bosiq, mehribon, aqlli inson. Agar u bo‘lmaganida men nima qilardim hayronman. Istalgan qiyin vaziyatda men unga qo‘ng‘iroq qilaman va maslahatlashaman.
O‘zbekistondagi xeyt haqida
— Instagram sahifamga salbiy izohlarni juda ko‘p yozishadi. Lekin o‘zbek tilini yaxshi tushunmaganim uchun xeytning 90 foizini tushunmayman. Xeyterlar asosan ochiq suratlarim uchun menga “sharmanda” deb yozishadi yoki “Sen bizning pulimiz evaziga yashayapsan”, deyishadi.
Ba’zan tushunishni istasam, yigitim yoki yordamchimdan tarjima qilib berishlarini so‘rayman. Lekin bunaqa narsalarga e’tibor bermayman. Lekin hozirda o‘zbekchani o‘rganyapman. O‘z repititorim bor. Bundan tashqari, Uzbekistan for english speakers dasturini yuklab olganman.
Reklamadan qancha daromad topadi?
— Sahifamda o‘zbekcha reklamalar joylashtirish 4 ming dollar. Kontent ustida men, videograf, fotograf, assistant, reklama menedjeri birgalikda ishlaymiz. Bizda reklamalar ko‘p. Lekin hamma reklamalarni ham sahifamga joylamayman.
Izoh (0)