Ўзбекистоннинг биринчи президенти Ислом Каримовнинг невараси, инста-блогер Марям Тиллаева журналист Кирилл Альтманга берган интервьюсида бобоси ҳақида хотиралари, ҳозирги шахсий ҳаёти, ота-онаси билан муносабатлари ҳамда келажак режалари хусусида сўзлаб берди.
“Ҳеч қачон ўзбекистонлик йигит билан учрашмайман, дердим”
— Ҳозирги йигитим ўзбек. У ўзбекистонлик. Мен ҳеч қачон ўзбекистонлик йигит билан учрашмайман, дердим. Чунки мен Европада ўсганман ва менталитетимиз фарқ қилади, дердим. У бойваччанинг боласи эмас. Жуда кўп ишлайди, у ғирт ўзбекча гапиради, шунинг учун рус тилида бир оз акцент билан гапиради. Шунинг учун мен ҳозир ўзбекчани ўрганишга ҳаракат қиляпман. У билан ўзимни жуда ҳам хотиржам ҳис этаман. У билан тенгдошмиз, мендан 10 кунлик катта. Унинг ойлиги мен Instagram’да топадиган бир кунлик реклама пулимдан камроқ. Лекин бу жуда катта аҳамиятга эга эмас. Мен Нью-Йоркда бўлган пайтим, у ҳар куни менга гулдаста жўнатди, бу жуда ёқимли эди. Ўзбекистонда мазам қочганида соат 3 да келиб мени шифокорга олиб борди. Бу нарсалар пулдан ҳам муҳимроқ.
Бизнеси ҳақида
— Мен ҳозир ўз косметика линиямни сотувга чиқаришга тайёрлаяпман. Бу ишни жуда осон деб ўйлаган эканман. Лекин Европадаги завод ва етказиб берувчилар билан муаммолар чиқяпти. Шуларни ҳал этиш билан бандман.
Ота-онаси билан қандай муносабатда эканлиги ҳақида
— Ота-онам билан ҳозир муносабатларимиз салом-аликдан нарига ўтмаяпти. Бир-биримизни байрамлар, туғилган кунлар билан табриклаймиз, бўлди. Бошқа гаплашмаймиз. Мен Амиранга турмушга чиққанимдан сўнг улар билан муносабатларимиз ёмонлашган. Ҳозир охиригача ярашганимиз йўқ. Улар бошиданоқ Амиранга тегишимга қарши бўлишган. Укам 18, синглим эса 13 ёшга тўлади, улар билан бирга эмасман, бу вақтни эса ортга қайтариб бўлмайди. Яқинда отамни туғилган куни билан табрикладим, у SMS’имга ҳатто жавоб ҳам бермади. Мен бу гапларим билан ота-онамни ёмонламоқчи эмасман. Шунчаки ҳозир бизнинг муносабатларимизда танаффус.
Бувиси ҳақида
— Амиран менинг яланғоч расмимни тарқатиб юборганида бувим унга телефон қилиб, “Оиламизни шарманда қиляпсан”, деган. Шундан кейин Амиран суратни саҳифасидан ўчириб ташлаган.
Аслида бувим жуда ҳам доно инсон. Мен муносабатларда бувимга ўхшашни жуда ҳам хоҳлардим. Айтганча, бобом ҳар сафар дастурхонга ўтираётганимизда “Агар рафиқам бўлмаганида мен ҳеч қачон президент бўлмасдим”, дерди. У бувимни жуда ҳурмат қиларди. Бувим қийин дамларда мени ҳар томонлама қўллаб-қувватлади. У билан айниқса Амиран билан турмуш қурганимиздан кейин яқинлашиб кетганмиз. Биз неваралар уни кичкиналигимиздан ойи деб чақирамиз. Сабаби менинг холаваччам Ислом болалигида онаси бувимни ойи, деб чақираётганини эшитиб, у ҳам бувимни ойилаб кетган. Шундан сўнг биз ҳам у каби бувимни ойи деб чақирамиз. Бувим Москвада битта ўзим қолиб кетганимда менга ёрдам қўлини чўзди. У ҳақиқий биринчи хоним. Мана масалан, мен ўз хонамга кирганимда кийимларимни ҳамма ёққа улоқтириб ташлашим мумкин. Бувим эса доимо хонасини тоза, озода сақлайди, ҳамма нарсани жой-жойига қўяди. Овқатланаётганида ҳам ўзини ҳақиқий биринчи хонимлардек тутади. У табиатан ўта тартибли, оғир-босиқ, меҳрибон, ақлли инсон. Агар у бўлмаганида мен нима қилардим ҳайронман. Исталган қийин вазиятда мен унга қўнғироқ қиламан ва маслаҳатлашаман.
Ўзбекистондаги хейт ҳақида
— Instagram саҳифамга салбий изоҳларни жуда кўп ёзишади. Лекин ўзбек тилини яхши тушунмаганим учун хейтнинг 90 фоизини тушунмайман. Хейтерлар асосан очиқ суратларим учун менга “шарманда” деб ёзишади ёки “Сен бизнинг пулимиз эвазига яшаяпсан”, дейишади.
Баъзан тушунишни истасам, йигитим ёки ёрдамчимдан таржима қилиб беришларини сўрайман. Лекин бунақа нарсаларга эътибор бермайман. Лекин ҳозирда ўзбекчани ўрганяпман. Ўз репититорим бор. Бундан ташқари, Uzbekistan for English speakers дастурини юклаб олганман.
Рекламадан қанча даромад топади?
— Саҳифамда ўзбекча рекламалар жойлаштириш 4 минг доллар. Контент устида мен, видеограф, фотограф, ассистант, реклама менеджери биргаликда ишлаймиз. Бизда рекламалар кўп. Лекин ҳамма рекламаларни ҳам саҳифамга жойламайман.
Изоҳ (0)