Qarshi tumani hokimi Zoir Aliqulov hokimlar qabulida bo‘lib, to‘rt muchasi sog‘ bo‘lsa-da, davlatdan biror nima undirishga urinayotgan boqimandalik kayfiyatidagi murojaatchilarni qoraladi. Bu haqda hokim fuqarolar uchun tashkil etilgan navbatdagi sayyor qabulida gapirgan.
Ko‘pchilik ber-ber degani bilan davlat bir marta beradi, ikki marta beradi, boringki uchinchi marotaba ham beradi. Lekin mana meni davlat boqar ekan, deb boqimandalik kayfiyatini o‘zida shakllantirib olish uyat, — dedi tuman hokimi.
Zoir Aliqulovning aytishicha, O‘zbekistonda ijtimoiy himoyaga muhtoj aholi qatlami shaxsan davlat rahbari e’tiborida turadi.
To‘g‘ri, ijtimoiy og‘ir ahvoldagi fuqaro bo‘lsa, davlat hech qachon o‘sha fuqarosini e’tiborsiz tashlab qo‘ymaydi. Bunday insonlarning ta’minoti muhtaram prezidentimizning shaxsan nazoratlarida bo‘ladi. Lekin to‘rt muchasi sog‘ insonning boqimandalikka berilib, davlatga ber-ber deyishi, avvalo o‘zining ham nafsoniyatiga tegishi kerak-da, — deydi tuman hokimi oqsoqollar bilan bu haqda maslahatlashar ekan.
Tuman hokimi bilan muloqotga kirishgan keksalarning hokimga bildirishicha, boqimandalik kayfiyati yoshlar orasida ko‘payib bormoqda.
To‘g‘ri aytyapsiz, bunaqa kayfiyatdagi insonlarning ayniqsa yoshlar orasida ko‘payishi ko‘p kuzatilmoqda. Keksalarimiz orasida bunday insonlar yo‘q, o‘zim ham shu el farzandi bo‘lganim uchun bu elning qanchalik mehnatkashligini bilaman, — deydi tuman hokimi keksalar bilan muloqot qilar ekan.
Qarshi tumani hokimligi axborot xizmati rahbari To‘lqin Turdiyevning “Daryo”ga qo‘shimcha qilishicha, hokimning mazkur qabulida aholining 100 ga yaqin muammosi tinglanib, aksariyatiga o‘sha joyning o‘zida yechim topilgan. Jumladan, xorijdan qaytgan Davlatbekka motokultivator yetkazib berilgan.
Xorijda mehnat migranti sifatida ishlab qaytgan Davlatbek Eshpo‘latov o‘zini o‘zi band qilish uchun motokultivator va asbob uskunalar so‘rab murojaat qilgandi. Hokim topshirig‘iga ko‘ra, uning murojaati qanoatlantirildi. Murojaatchi Olmaxon Hayitovaning shikoyatiga ko‘ra, uning otasiga shu kunning o‘zida eshitish moslamasi yetkazib berildi, — deydi To‘lqin Turdiyev.
Eslatib o‘tamiz, prezident Shavkat Mirziyoyev Qashqadaryo viloyatiga tashrifi davomida Qarshi tuman tibbiyot birlashmasining kirish qismidagi noqonuniy bozor va hududdagi maktab faoliyatini tanqid qilib, vaziyat qoniqarsiz ekanini aytgandi. Prezident tanqidi ortidan tuman hokimi ishdan olinib, o‘rnida Dehqonobod tumani hokimi Zoir Aliqulov ish boshlagan edi.
Izoh (0)