Maktabgacha va maktab ta’limi vazirining birinchi o‘rinbosari Usmon Sharifxo‘jayev “Kun.uz”ga bergan intervyusida xorijiy donorlar asosida ishlab chiqilishi belgilangan metodikalar, darsliklar masalasi nima bo‘ladi, degan savolga ham javob berib o‘tdi.
“Bu savol ham ko‘p ko‘tarilgan edi, ya’ni ulardan voz kechiladimi? Ulardan hech kim voz kechgani yo‘q, sababi sizga bu borada misollarni ham keltirishim mumkin. Bu yerda aniq misollarni gapiramiz. USAID tashkiloti yordamida ishlangan ingliz tili va informatikani Kembrij darsliklari tizimini joriy qilish masalasi bor, shu tashkilotdan 5 yil uchun O‘zbekiston litsenziya sotib olgan va bu darsliklar hozirda amalda.
Matematika yoki ona tili haqida gapirsak, bu darsliklar yangilandi, ularni bosqichma-bosqich joriy qilish masalasi qo‘yilgandi. 4-sinf darsligini vazirlik huzuridagi markaz (Respublika ta’lim markazi) yaratmagan edi, yo‘q edi. Xalqaro tajribalar asosida yangi darsliklarni joriy qilish bo‘yicha taqdimotlar o‘tganidan keyin, ularni joriy qilish masalasi qo‘yilganidan so‘ng, o‘quv dasturi takomillashtirilib, vazirlik tomonidan tasdiqlandi. Hozir vazirlikning 280-sonli buyrug‘i bilan o‘quv dasturi takomillashtirilgan holda sentyabrdan boshlab 1-4-sinfning yangi darsliklari joriy qilindi”, — dedi Usmon Sharifxo‘jayev.
Shuningdek, vazir o‘rinbosari mutaxassislar bilan ishlab chiqilgan va farmon, qonuniy hujjat bilan tasdiqlangan dasturdan voz kechib, yangisiga ehtiyoj nima sabab paydo bo‘ldi, degan savolga javob bergan.
“Ta’lim sifatini nazorat qilish inspeksiyasi bo‘lgandi, dekabr oyidan boshlab tugatilib, yarim vakolati Maktabgacha va maktab ta’limi vazirligiga, qolgani oliy ta’limga o‘tdi. Ular tomonidan o‘tkazilgan xalqaro tadqiqotlar andozasidagi tadqiqotlar yoki haqiqiy xalqaro tadqiqotlarning dastlabki natijasidan kelib chiqib dasturni takomillashtirish ishlari amalga oshirilmoqda.
Eski, yangi darsliklar masalasi faqat darslik muallifiga qiziq bo‘lishi kerak, menimcha. Chunki biz baribir dastur va ko‘nikmadagi ta’lim berish jarayoni haqida o‘ylashimiz kerak. Lekin agarda shu ko‘nikmani yaxshiroq, oddiyroq kerak bo‘lsa og‘irroq shaklda berishga ehtiyoj bo‘ladigan bo‘lsa, uni o‘zgartirishga to‘g‘ri keladi. Lekin darslikning ichi, muallifi o‘zgarishi ikkilamchi bo‘lishi kerak”, — dedi Usmon Sharifxo‘jayev.
Izoh (0)