Prezident Shavkat Mirziyoyev Qashqadaryo viloyatiga tashrifi chog‘ida viloyatning Qarshi tumanida bo‘lib, tumandagi shifoxona va maktab ahvolidan qoniqmagani ma’lum bo‘lgandi. Shundan so‘ng tuman hokimi Behzod Yusupov ishdan olinib, o‘rnini Dehqonobod tumani hokimi Zoir Aliqulov egallagandi. Qarshi tumanining yangi hokimi lavozimiga kirishishidan avval tumanni rivojlantirish uchun davlat rahbaridan 57 ta topshiriq olganini aytgandi. Prezident topshirig‘i ijrosi bilan shug‘ullanayotgan hokimning ma’lumot berishicha, Qarshi tumanidagi istirohat bog‘i va bozor yangilanadi.
Tumandagi eski, qarovsiz yotgan istirohat bog‘i ishga tushiriladi va yangilanadi. “Beshkent” bozorida savdogarlar uchun qulay sharoitlar yaratiladi, — dedi Zoir Aliqulov mas’ullar bilan hududni ko‘zdan kechirar ekan.
Tuman hokimligi axborot xizmati rahbari To‘lqin Turdiyevning “Daryo”ga ma’lumot berishicha, tuman hokimi bu haqda 30-oktyabr kuni hududlarni ko‘zdan kechirish chog‘ida ma’lum qilgan.
O‘sha kuni dastlab Beshkent shahrida qurilgan bozor bilan tanishgan hokim, so‘ngra tuman markaziy istirohat bog‘iga borgan.
Afsuski, tayyor bozor tuman tibbiyot birlashmasidan uncha uzoq emas. Shunday sharoit yaratamizki, kim savdogar bo‘lsa shu yerga kelib, tadbirkorligini davom ettiradi. Dehqonobod tumanida hokimlik vazifasiga kirishganimning ilk yilidayoq, aholi kayfiyatini yanada ko‘tarish maqsadida qarovsiz yotgan istirohat bog‘ini ta’mirlatib, ishga tushirgandik. Qarshi tumanida ham ushbu bog‘ni ta’mirlashga alohida e’tibor qaratiladi, — dedi tuman hokimi.
Hokim bu haqda mas’ullarga bildirar ekan, aholi gavjum bo‘lgan ushbu istirohat bog‘ini tez kunlarda aholi xizmatiga shay holatga keltirish choralarini ko‘rish haqida topshiriq berdi.
Qo‘shimcha qilinishicha, Qarshi tumanining yangi hokimi shu kuni Yoshlar markaziga ajratilgan bino hamda Motamsaro ona haykalini ko‘zdan kechirib, mas’ullarga tegishli topshiriqlar bergan.
Izoh (0)