“Тўрт мучаси соғ инсоннинг давлатдан нимадир ундириш учун бер-бер дейиши уят”. Зоир Алиқулов боқимандаликни қоралади

Қарши тумани ҳокими Зоир Алиқулов ҳокимлар қабулида бўлиб, тўрт мучаси соғ бўлса-да, давлатдан бирор нима ундиришга уринаётган боқимандалик кайфиятидаги мурожаатчиларни қоралади. Бу ҳақда ҳоким фуқаролар учун ташкил этилган навбатдаги сайёр қабулида гапирган.

Кўпчилик бер-бер дегани билан давлат бир марта беради, икки марта беради, борингки учинчи маротаба ҳам беради. Лекин мана мени давлат боқар экан, деб боқимандалик кайфиятини ўзида шакллантириб олиш уят, — деди туман ҳокими. 

Зоир Алиқуловнинг айтишича, Ўзбекистонда ижтимоий ҳимояга муҳтож аҳоли қатлами шахсан давлат раҳбари эътиборида туради. 

Тўғри, ижтимоий оғир аҳволдаги фуқаро бўлса, давлат ҳеч қачон ўша фуқаросини эътиборсиз ташлаб қўймайди. Бундай инсонларнинг таъминоти муҳтарам президентимизнинг шахсан назоратларида бўлади. Лекин тўрт мучаси соғ инсоннинг боқимандаликка берилиб, давлатга бер-бер дейиши, аввало ўзининг ҳам нафсониятига тегиши керак-да, — дейди туман ҳокими оқсоқоллар билан бу ҳақда маслаҳатлашар экан. 

Туман ҳокими билан мулоқотга киришган кексаларнинг ҳокимга билдиришича, боқимандалик кайфияти ёшлар орасида кўпайиб бормоқда. 

Тўғри айтяпсиз, бунақа кайфиятдаги инсонларнинг айниқса ёшлар орасида кўпайиши кўп кузатилмоқда. Кексаларимиз орасида бундай инсонлар йўқ, ўзим ҳам шу эл фарзанди бўлганим учун бу элнинг қанчалик меҳнаткашлигини биламан, — дейди туман ҳокими кексалар билан мулоқот қилар экан. 

Қарши тумани ҳокимлиги ахборот хизмати раҳбари Тўлқин Турдиевнинг “Дарё”га қўшимча қилишича, ҳокимнинг мазкур қабулида аҳолининг 100 га яқин муаммоси тингланиб, аксариятига ўша жойнинг ўзида ечим топилган. Жумладан, хориждан қайтган Давлатбекка мотокултиватор етказиб берилган.

Хорижда меҳнат мигранти сифатида ишлаб қайтган Давлатбек Эшпўлатов ўзини ўзи банд қилиш учун мотокултиватор ва асбоб ускуналар сўраб мурожаат қилганди. Ҳоким топшириғига кўра, унинг мурожаати қаноатлантирилди. Мурожаатчи Олмахон Ҳайитованинг шикоятига кўра, унинг отасига шу куннинг ўзида эшитиш мосламаси етказиб берилди, — дейди Тўлқин Турдиев.

Эслатиб ўтамиз, президент Шавкат Мирзиёев Қашқадарё вилоятига ташрифи давомида Қарши туман тиббиёт бирлашмасининг кириш қисмидаги ноқонуний бозор ва ҳудуддаги мактаб фаолиятини танқид қилиб, вазият қониқарсиз эканини айтганди. Президент танқиди ортидан туман ҳокими ишдан олиниб, ўрнида Деҳқонобод тумани ҳокими Зоир Алиқулов иш бошлаган эди.