Qarshi tumani hokimi Zoir Aliqulov sayyor qabulida bo‘lib, tuman tibbiyot birlashmasining kirish yo‘laklari va yo‘l yuzida savdo qilishga ruxsat so‘ragan savdogar ayollarga noqonuniy savdoga chek qo‘yilishini ma’lum qildi. Bu haqda tuman hokimining fuqarolar uchun mo‘ljallangan birinchi qabulida so‘z bordi, deya xabar berdi “Daryo” muxbiri.
2023-yilning 9-noyabr kuni murojaatchi fuqarolarni qabul qilgan Zoir Aliqulov ularning muammosini o‘rgandi.
Dastlab “Quyi Beshkent” mahallasining Shaydullo qishlog‘ida yashovchi murojaatchilarni qabul qilgan hokim ularni ko‘pdan beri qiynab kelayotgan elektr toki bilan bog‘liq muammoni hal qildi.
Murojaatchilarga ko‘ra, qishloqdagi 72 xonadonda 90 oila istiqomat qiladi. Aholi soni esa 350 nafar kishini tashkil etadi. O‘tgan yillar davomida ushbu xonadonlarda elektr toki kuchlanishi past bo‘lib, aholining haqli e’tiroziga sabab bo‘lib kelgan.
Ushbu qishloqda istiqomat qiluvchi fuqaro Shoymurod Toshevning bildirishicha, qishloq ahli elektr ta’minotidagi uzilishlardan zada bo‘lgan. Ayniqsa, havo harorati pasayishi bilan bu uzilishlar ko‘payib, katta-yu kichikning tashvishiga aylanadi. Buning sababi, qishloqda aholi soni ortgan bo‘lsa-da 60 kVA quvvatli transformator haligacha qishloqqa xizmat qilayotganligidir.
Qabulda tuman hokimi tomonidan aholi xonadonlari sonidan kelib chiqib, qishloq ahlini sifatli elektr ta’minoti bilan ta’minlash uchun o‘rinbosari Olim Ochilov va tuman Elektr tarmoqlari korxonasi AJ boshlig‘i O‘ktam Xolovga topshiriq berildi. Va muammo joyida hal etildi.
Shuningdek, Zoir Aliqulov qabulida bo‘lgan savdogar ayollarni qabul qilib, prezident tanqidiga sabab bo‘lgan noqonuniy bozor faoliyatiga chek qo‘yilganini ma’lum qildi.
Endi bozor ichkarisiga kirib, qonuniy tartibda savdo qilasizlar. Lekin bunaqa tartibsiz, sanitariya talablariga javob bermaydigan bozorga ruxsat bermaymiz. Bozorda barcha shart-sharoitni yaratdik. Yanayam yaxshilaymiz, tozalaymiz va tartibga keltiramiz. Chiroyli bozor bo‘ladi, — dedi tuman hokimi.
Savdogar ayollar ko‘chadagi noqonuniy savdo orqali ro‘zg‘origa daromad olib kirayotganini aytib, hokimdan ko‘chada, tartibsiz bozorda savdo qilishga ruxsat so‘rashda davom etdi. Hokim bunga javoban bunga hech qachon ruxsat berilmasligini bildirdi.
Eslatib o‘tamiz, prezident Shavkat Mirziyoyev Qashqadaryo viloyatiga tashrifi davomida Qarshi tuman tibbiyot birlashmasining kirish qismidagi noqonuniy bozor va hududdagi maktab faoliyatini tanqid qilib, vaziyat qoniqarsiz ekanini aytgandi. Prezident tanqidi ortidan tuman hokimi ishdan olinib, o‘rnida Dehqonobod tumani hokimi Zoir Aliqulov ish boshlagan edi.
Izoh (0)