Finlyandiyada 2,5 million yevrodan ortiq qiymatga ega Yevropa Ittifoqi sanksiyalari ostida qolgan rossiyalik olim va tadbirkor Boris Aleshinning mulki hibsga olindi. Bu haqda “RIA Novosti” xabar berdi.
“Yevropa Ittifoqi sanksiyalari ostidagi rossiyalik tadbirkor Boris Aleshinning kurort mulki Kirkkonummidagi qarzlarni undirish agentligi tomonidan hibsga olindi. Hibsga olish sentyabr oyida Tashqi ishlar vazirligi talabiga binoan amalga oshirilgan”, — deyiladi xabarda.
Ushbu qarorga muvofiq, Aleshinning qiymati 2,5 million yevrodan ortiq bo‘lgan ikkita mulki musodara qilingan. Unga tegishli ko‘chmas mulk, xususan, sud ijrochisining ruxsatisiz garovga qo‘yilishi yoki begonalashtirilishi mumkin emas.
Iyun oyida Yevroittifoq 68 yoshli Aleshinni Ukrainadagi urush bilan bog‘liq sanksiyalarga qo‘shdi. Yevropa Ittifoqi rasmiylariga ko‘ra, moskvalik tadbirkor va olim Rossiya mudofaa sanoati bilan bog‘liq bir qancha kompaniyalarda ishlaydi. U birlashgan aviatsiya korporatsiyasining maslahatchisi bo‘lib, uning sho‘ba korxonalari Rossiya harbiylari tomonidan foydalaniladigan “MiG” va “Suxoy” qiruvchi samolyotlarini ishlab chiqaradi.
Aleshin, shuningdek, “Kronshtadt” guruhi direktorlar kengashi raisi. Bu kompaniya Rossiya tomonidan foydalaniladigan Orion dronlarini ishlab chiqaradi.
Izoh (0)