London Oliy sudi Roman Abramovichning biznes sherigi, milliarder Yevgeniy Shvidlerga nisbatan Rossiyaning Ukrainaga hujumidan keyin qo‘yilgan sanksiyalarni bekor qilishdan bosh tortdi. Bu haqda Reuters xabar berdi.
Britaniya Shvidlerni Abramovich hamda Rossiyaning “Sibneft” va “Yevraz” kompaniyalari bilan aloqalari tufayli 2022-yilning mart oyida sanksiyalar ro‘yxatiga kiritgandi. Shundan so‘ng tadbirkorning ikkita shaxsiy samolyoti hibsga olingan. Shvidler Britaniya rasmiylari xatoga yo‘l qo‘yganini aytib, qaror ustidan sudga shikoyat qilgan.
Tadbirkorning advokatlari sudda Shvidlerning Rossiya prezidenti Vladimir Putin va Kreml siyosatiga aloqasi yo‘qligini va 2007-yilda sobiq prezident Boris Yelsinning dafn marosimidan beri Rossiyada bo‘lmaganini aytgan.
Advokatlarning fikricha, sanksiyalar tadbirkorni aktivlarini boshqarish va biznes yuritish imkoniyatidan mahrum qilgan, shuningdek, uning obro‘siga putur yetkazgan.
Milliarder himoyachilaridan biri Maykl O’Keyn tadbirkor “yaqin fursatda” Oliy sud qarori ustidan shikoyat qilishini aytdi.
“U hech qachon Rossiya fuqarosi bo‘lmagan, 15 yildan ortiq vaqt davomida Rossiyaga bormagan va Rossiya hukumatining Ukrainadagi harakatlarini tanqid qilgan. Britaniya hukumatining bunday siyosati yoki tavsiyasi yo‘qligini hisobga olsak, Shvidler sanskiyalari ro‘yxatidan chiqishi uchun yana nima qilishi mumkinligini bilmaydi”, — dedi advokat.
Rossiyaning Ukrainaga bosqinidan so‘ng, ko‘plab rossiyalik ishbilarmonlar va siyosatchilar Yevropa Ittifoqi, AQSH, Buyuk Britaniya, Yaponiya, Kanada, Avstraliya va boshqa mamlakatlarning sanksiyalari ostida qoldi.
Yevgeniy Shvidlerdan tashqari, milliarderlar Roman Abramovich, Alisher Usmonov, Pyotr Aven va Mixail Fridman ham sudlarda bu qarorga qarshi chiqishga urinmoqda.
Izoh (0)