Buyuk Britaniyaning milliy jinoyat agentligi (NCA) rossiyalik oligarx Mixail Fridmanni hibsga oldi. Bu haqda Financial Times xabar berdi.
Milliarder pul yuvish, Ichki ishlar vazirligini aldash va yolg‘on guvohlik berish uchun til biriktirish kabi jinoyatlarda gumon qilib ushlangan. 58 yoshli tadbirkor 1-dekabr, payshanba kuni Londondagi qarorgohida kleptokratiyaga qarshi kurash bo‘limi xodimlari tomonidan hibsga olingan. Fridman bilan birga bir necha ming funt naqd pul solingan sumka bilan qarorgohdan chiqib ketayotgan 35 yoshli erkak ham qo‘lga olingan.
U pul yuvish va Britaniya milliy jinoyat agentligiga to‘sqinlik qilishda gumon qilinmoqda. Shuningdek, yana bir 39 yoshli erkak Londondagi uyida bir qator jinoyatlar, jumladan, pul yuvish va firibgarlik maqsadida til biriktirganlik uchun hibsga olingan.
Fridmanning uyini tintuv qilish chog‘ida bir nechta raqamli qurilmalar va katta miqdordagi naqd pul musodara qilingan. Ta‘kidlanishicha, qo‘lga olingan uchala shaxs NCA tomonidan so‘roq qilingan va keyinchalik garov evaziga qo‘yib yuborilgan.
“2022-yilda tashkil etilgan NCA’ning Kleptokratiyaga qarshi bo‘limi oligarxlar va professional xizmat ko‘rsatuvchilarning, shuningdek, Rossiya rejimi bilan bog‘liq bo‘lgan shaxslar tomonidan potensial jinoiy faoliyatni tekshirishda sezilarli yutuqlarga erishdi. Biz ushbu tahdidni bartaraf etishda mavjud kuch va taktikalarni ishga solishda davom etamiz”, — deydi NCA bosh direktori Grem Biggar.
Agentlik hibsga olinganlar ismini ochiqlamagan, ammo Fridmanga yaqin manba Rossiyaning “TACC” agentligiga mazkur ma’lumotni tasdiqlab, milliarder garov evaziga qo‘yib yuborilganini aytgan.
“Fridman unga nisbatan qo‘llanilgan sanksiyalarni buzganlikda gumonlangani uchun qo‘lga olindi”, — deydi “TACC” manbasi.
Mixail Fridman Rossiya Alfa bankining nazorat paketiga ega. U va uning biznes hamkorlari Petr Aven, German Xan Yevropa Ittifoqi va Buyuk Britaniyaning sanksiyalar ro‘yxatiga tushgan, biroq hozirgacha AQSH sanksiyalaridan qochib qutilishga muvaffaq bo‘lgan.
Mavzuga doir: Fridman o‘ziga qarshi sanksiyalarni bekor qilish evaziga Ukrainaga 1 milliard dollar taklif qildi
Izoh (0)