Madaniyat vaziriga ikki nafar birinchi o‘rinbosar va o‘rinbosar tayinlandi

Bahodir Ahmedov madaniyat vazirining birinchi o‘rinbosari lavozimiga tayinlandi. Bu haqda Madaniyat vazirligi matbuot xizmati xabar berdi.

Bahodir Ahmedov (1973-yilda tug‘ilgan) turli yillarda “O‘zbeknavo” estrada birlashmasi bosh direktori, madaniyat va sport vaziri, Toshkent viloyati hokimining yoshlar siyosati, ijtimoiy rivojlantirish va maʼnaviy-maʼrifiy ishlar bo‘yicha o‘rinbosari lavozimlarida ishlagan. 2020-yilning yozida O‘zbekiston chim ustida xokkey federatsiyasiga rais etib saylangan edi. Tayinlovga qadar u madaniyat vaziri o‘rinbosari lavozimida ishlab kelayotgandi.

1-noyabr kuni Avazxon Tojixonov madaniyat vazirining birinchi o‘rinbosari lavozimiga tayinlangani to‘g‘risida xabar berilgandi. Tayinlovga qadar u Adliya vazirligi “Konvension markaz majmuasi direksiyasi” DUK direktori lavozimida faoliyat yuritgan.

Shuningdek, Yusufjon Usmonov madaniyat vazirining o‘rinbosari lavozimiga tayinlandi. Tayinlovga qadar u Hisob palatasining Iqtisodiyot, davlat investitsiya dasturlari va jamoat tashkilotlarini davlat tomonidan qo‘llab-quvvatlash xarajatlarini audit qilish sho‘basi bosh inspektori lavozimida faoliyat yuritgan.

Avvalroq O‘zbekiston madaniyat vaziri o‘rinbosari Bahodir Ahmedov bir guruh sanʼatkorlar bilan o‘tkazgan yig‘ilishida “X-faktor” loyihasini tanqid qilib o‘tgandi. Bu fikrlar ijtimoiy tarmoqlarda ko‘plab muhokamalarga sabab bo‘lganidan keyin telekanal o‘zining Instagram profilida bunga munosabat bildirdi.