Korrupsiyaga qarshi kurashish agentligi tomonidan madaniyat va turizm vaziri Ozodbek Nazarbekov “Koba san‘at majmuasi” jamiyatining ta‘sischisi ekani va bu noqonuniy ekani xabar berilgan edi.
Vazir Ozodbek Nazarbekovning 2016-yil mart oyida davlat ro‘yxatidan o‘tkazilgan “Koba san‘at majmuasi” MCHJda 100 foizlik ulush bilan ta‘sischi ekanligi aniqlangan. Bu qonunga zid bo‘lgani bois jamiyat ta‘sischisi o‘zgartirilgan.
Holat yuzasidan Madaniyat va turizm vazirligiga kelgusida “Davlat fuqarolik xizmati to‘g‘risida”gi qonun va korrupsiyaga yo‘l qo‘ymaslik choralarini ko‘rish yuzasidan taqdimnoma kiritilgan.
Agentlik matbuot xizmatining “Daryo”ga maʼlum qilishicha, taqdimnomaga asosan Madaniyat va turizm vazirligi markaziy apparati va uning quyi boshqarmalari rahbarlari ishtirokida kengaytirilgan yig‘ilishi o‘tkazilgan.
“Yig‘ilishda vazirlik va uning tarkibidagi barcha tashkilotlar faoliyatida ochiqlik va shaffoflik, raqobat va xolislik hamda korrupsiyaga yo‘l qo‘ymaslik prinsiplariga rioya qilinishini taʼminlash bo‘yicha birinchi navbatdagi chora-tadbirlar tasdiqlangan”, — deyiladi Korrupsiyaga qarshi kurashish agentligi axborotida.
Ochiqlik va shaffoflikka bag‘ishlangan yig‘ilishni kim o‘tkazgani haqida maʼlumot berilmagan.
Maʼlumot uchun, Vazirlar Mahkamasining 2022-yil 14-oktabrdagi qarori bilan tasdiqlangan “Davlat fuqarolik xizmatchilari odob-axloqining namunaviy qoidalari”da davlat xizmatchilari ishdan tashqari vaqtda tadbirkorlik yoki haq to‘lanadigan boshqa faoliyat bilan (pedagogik, ilmiy va ijodiy faoliyatdan tashqari) shug‘ullanmasligi belgilangan.
Izoh (0)