Tashqi ishlar vaziri Baxtiyor Saidov kecha, 23-oktyabr kuni Lyuksemburgda Yevropa investisiya banki vitse-prezidenti Tereza Chervinskaya bilan muzokara o‘tkazdi.
“Yevropa investitsiya banki vitse-prezidenti Tereza Chervinskaya xonim bilan uchrashishdan mamnunmiz. Kelgusidagi hamkorligimiz yuzasidan makroiqtisodiy farovonlikdan tortib yashil energetikagacha bo‘lgan ko‘plab istiqbolli yo‘nalishlarda samimiy suhbatlashdik. Yevropa investitsiya banki O‘zbekistondagi islohotlar dasturini qo‘llab-quvvatlab kelayotganini qadrlaymiz va uning Toshkentda vakolatxonasi ochilishini olqishlaymiz”. — deb yozdi O‘zbekiston TIV rahbari o‘zining Telegram-kanalida.
Tashqi ishlar vaziri Baxtiyor Saidov “Yevropa Ittifoqi — Markaziy Osiyo” 19-vazirlar yig‘ilishida ishtirok etish uchun Lyuksemburgga borgan edi. Yig‘ilishda vazirlar keng qamrovli hamkorlik natijasida erishilgan yutuqlarni sarhisob qildi va kelgusi yil uchun asosiy ustuvor vazifalarni belgilab oldi.
Baxtiyor Saidov tashrif davomida Yevropa Ittifoqining Xalqaro hamkorlik bo‘yicha komissari Yutta Urpilaynen bilan ham uchrashdi, Avstriya Yevropa va tashqi ishlar federal vaziri Aleksandr Shallenberg bilan O‘zbekiston—Avstriya ikki tomonlama munosabatlarini muhokama qildi, Ruminiya tashqi ishlar vaziri Luminita Odobesku bilan mamlakatlari ishbilarmon doiralari vakillari o‘rtasidagi aloqalarni rivojlantirishni ko‘rib chiqdi.
Bolgariya bosh vaziri o‘rinbosari va tashqi ishlar vaziri Mariya Gabriel bilan O‘zbekiston—Bolgariya munosabatlarida mavjud ulkan salohiyatni ro‘yobga chiqarish yuzasidan fikr almashdi. Estoniya tashqi ishlar vaziri Margus Tsahkna bilan savdo-iqtisodiy hamkorlikni kengaytirish, raqamli texnologiyalar sohasida Estoniyaning ilg‘or tajribasini O‘zbekistonga olib kirish bo‘yicha birgalikdagi sa’y-harakatlarni ko‘rib chiqdi.
Litva tashqi ishlar vaziri Gabrielius Landsbergis bilan muzokaralarda siyosiy muloqotni faollashtirish, savdo, investitsiya, transport-logistika, ta’lim va boshqa ko‘plab sohalarda sheriklikni rivojlantirish bo‘yicha qo‘shma chora-tadbirlar ko‘rishga kelishildi.
Ispaniya tashqi ishlar vaziri Xose Manuel Albares bilan muzokaralar chog‘ida transport sohasida zamonaviy kommunikatsiya tizimlarini joriy etish, turizm va taʼlim yo‘nalishlarida hamkorlikni kengaytirish, bo‘lajak qo‘shma tadbirlarni o‘tkazish masalalari muhokama qilindi.
Portugaliya tashqi ishlar vaziri Joao Gomesh Kravinyo bilan uchrashuv kun tartibidan siyosiy muloqotni mustahkamlash, savdo-iqtisodiy va investitsiyaviy hamkorlikni faollashtirish, madaniy va turizm almashinuvlarini jadallashtirish masalalari o‘rin oldi.
Izoh (0)