Ташқи ишлар вазири Бахтиёр Саидов кеча, 23 октябрь куни Люксембургда Европа инвестисия банки вице-президенти Тереза Червинская билан музокара ўтказди.
“Европа инвестиция банки вице-президенти Тереза Червинская хоним билан учрашишдан мамнунмиз. Келгусидаги ҳамкорлигимиз юзасидан макроиқтисодий фаровонликдан тортиб яшил энергетикагача бўлган кўплаб истиқболли йўналишларда самимий суҳбатлашдик. Европа инвестиция банки Ўзбекистондаги ислоҳотлар дастурини қўллаб-қувватлаб келаётганини қадрлаймиз ва унинг Тошкентда ваколатхонаси очилишини олқишлаймиз”. — деб ёзди Ўзбекистон ТИВ раҳбари ўзининг Telegram-каналида.
Ташқи ишлар вазири Бахтиёр Саидов “Европа Иттифоқи — Марказий Осиё” 19-вазирлар йиғилишида иштирок этиш учун Люксембургга борган эди. Йиғилишда вазирлар кенг қамровли ҳамкорлик натижасида эришилган ютуқларни сарҳисоб қилди ва келгуси йил учун асосий устувор вазифаларни белгилаб олди.
Бахтиёр Саидов ташриф давомида Европа Иттифоқининг Халқаро ҳамкорлик бўйича комиссари Ютта Урпилайнен билан ҳам учрашди, Австрия Европа ва ташқи ишлар федерал вазири Александр Шалленберг билан Ўзбекистон—Австрия икки томонлама муносабатларини муҳокама қилди, Руминия ташқи ишлар вазири Луминита Одобеску билан мамлакатлари ишбилармон доиралари вакиллари ўртасидаги алоқаларни ривожлантиришни кўриб чиқди.
Болгария бош вазири ўринбосари ва ташқи ишлар вазири Мария Габриэль билан Ўзбекистон—Болгария муносабатларида мавжуд улкан салоҳиятни рўёбга чиқариш юзасидан фикр алмашди. Эстония ташқи ишлар вазири Маргус Цаҳкна билан савдо-иқтисодий ҳамкорликни кенгайтириш, рақамли технологиялар соҳасида Эстониянинг илғор тажрибасини Ўзбекистонга олиб кириш бўйича биргаликдаги саъй-ҳаракатларни кўриб чиқди.
Литва ташқи ишлар вазири Габриэлиус Ландсбергис билан музокараларда сиёсий мулоқотни фаоллаштириш, савдо, инвестиция, транспорт-логистика, таълим ва бошқа кўплаб соҳаларда шерикликни ривожлантириш бўйича қўшма чора-тадбирлар кўришга келишилди.
Испания ташқи ишлар вазири Хосе Мануэл Альбарес билан музокаралар чоғида транспорт соҳасида замонавий коммуникация тизимларини жорий этиш, туризм ва таълим йўналишларида ҳамкорликни кенгайтириш, бўлажак қўшма тадбирларни ўтказиш масалалари муҳокама қилинди.
Португалия ташқи ишлар вазири Жоао Гомеш Кравинё билан учрашув кун тартибидан сиёсий мулоқотни мустаҳкамлаш, савдо-иқтисодий ва инвестициявий ҳамкорликни фаоллаштириш, маданий ва туризм алмашинувларини жадаллаштириш масалалари ўрин олди.
Изоҳ (0)