Rossiya prezidenti Vladimir Putin “Valday” xalqaro munozara klubining 20-yig‘ilishi doirasidagi konferensiya chog‘ida Rossiya yadro qurolini sinovdan o‘tkazishi kerakmi yoki yo‘qligini bilmasligini aytdi.
Uning ta’kidlashicha, Qo‘shma Shtatlar faqat yadroviy qurol sinovlarini taqiqlash haqidagi hujjatni imzolagan, Rossiya ham uni imzolagan va ratifikatsiya qilgan. Putinning fikricha, “nazariy jihatdan bu ratifikatsiyani bekor qilish mumkin”.
“Men yadroviy qurol sinovlariga qaytishga chaqiriqlarni ko‘ryapman. Yadro sinovlari o‘tkazilishi kerakmi yoki yo‘qmi, bir narsa deyishga tayyor emasman, lekin biz vaziyatga qarab muqobil javob qaytaramiz”, — dedi Putin.
Uning so‘zlariga ko‘ra, agar Rossiyaga qarshi yadro quroli qo‘llanilsa, javob zarbasida “shunchalik ko‘p raketalar bo‘ladiki, birorta ham dushman omon qolish imkoniyatiga ega bo‘lmaydi”.
Putin yadro qurolidan foydalanish imkoniyati harbiy doktrinada ko‘rsatilganini ta’kidladi. Hozircha u bu borada biror narsani o‘zgartirish zaruriyatini ko‘rmayotganini qo‘shimcha qildi.
“Hamma narsani o‘zgartirish mumkin, lekin men bunga ehtiyoj sezmayapman. Bugungi kunda Rossiya davlatchiligi va Rossiya davlatining mavjudligiga tahdid soladigan vaziyat yo‘q”, — dedi Rossiya prezidenti.
Izoh (0)