Yevroparlament budjet va tashqi ishlar qo‘mitalari rekonstruksiya va modernizatsiya ishlari uchun Ukrainaga 50 milliard yevro ajratish taklifini maʼqullaganini maʼlum qildi.
86 deputat moliyaviy yordamni qo‘llab-quvvatladi, 6 nafar deputat qarshi chiqdi, yana 2 nafar deputat betaraf qoldi. Yevroparlament bayonotida “Yevropa Ittifoqi budjetini uzoq muddatli ko‘rib chiqishga muvofiq yordam paketini zudlik bilan qabul qilish zarurligi” haqida so‘z boradi.
Yordam paketi kelgusi yilning yillik budjetiga kiritiladi. Ushbu budjet bo‘yicha muzokaralar noyabr oyida bo‘lib o‘tadi. Yevropalik deputatlarning asosiy talablaridan biri Ukrainani qayta tiklash uchun Rossiya aktivlaridan foydalanishdir.
“Ukraina uchun taklif etilayotgan jamg‘arma Yevropa Ittifoqining uzoq muddatli budjetini qayta ko‘rib chiqishning bir qismi bo‘lib, 2021-yildan buyon ko‘plab inqirozlardan so‘ng u jiddiy ravishda kamayib ketganligi sababli tuzatishga muhtoj”, — deyiladi rezolyutsiyada.
Bundan tashqari, Yevroparlament aʼzolari Ukrainadagi firibgarlik, korrupsiya, manfaatlar to‘qnashuvi va Yevropa Ittifoqi mablag‘laridan foydalanishdagi qonunbuzarliklarga qarshi kurashni talab qilishdi. 16–19-oktabr kunlari bo‘lib o‘tadigan yalpi majlisda Yevropa parlamentining to‘liq tarkibi loyihaga ovoz berishda qatnashadi.
Izoh (0)