AQSH prezidenti Jo Baydenning Komander laqabli 2 yoshli nemis ovcharkasi ortiq Oq uyda yashamaydi. Maxfiy xizmat xodimlarini tishlash holatlari tufayli it yangi joyga ko‘chirildi, deb xabar bermoqda UPI.
Birinchi xonim Jill Baydenning matbuot kotibi Elizabet Aleksandr it Oq uyda yashamayotganini tasdiqladi.
AQSH prezidentining oilasi Maxfiy xizmat zobitlarini tishlashga aloqador o‘nga yaqin voqealar uchun itga nisbatan keyingi qadamlarni ko‘rib chiqmoqda.
“Prezident va birinchi xonim Oq uyda ishlaydiganlar va ularni har kuni himoya qiladiganlarning xavfsizligi haqida chuqur qayg‘uradi. Ular AQSH Maxfiy xizmati va barcha manfaatdor tomonlarning sabr-toqati va yordami uchun minnatdor. Hozirda Komander Oq uy hududida emas”, — dedi Elizabet Aleksandr.
Baydenlar oilasi Komanderni 2021-yil dekabr oyida Oq uyga olib kelishgandi. O‘shandan beri it bir nechta odamni tishlashga ulgurdi. Maxfiy xizmat ma’lumotlariga ko‘ra, u to‘rt oy ichida odamlarga 10 marta hujum uyushtirgan.
25-sentyabr kuni it 11-odamni tishlaganidan keyin Oq uydan olib ketildi: o‘shanda u yana bir Maxfiy xizmat agentiga hujum qilgan.
Baydenning Mayor ismli boshqa iti avvalroq Jo Baydenning Delaverdagi uyiga yuborilgandi. Bunga ham itning hujumkorligi sabab bo‘lgan.
Izoh (0)