Tayvanda “Koinu” to‘foni tufayli aviaparvozlar bekor qilinib, maktablar faoliyati to‘xtatildi

Tayvanda “Koinu” to‘foni yaqinlashgani sababli maktab mashg‘ulotlari to‘xtatildi, bir qator aviaparvozlar bekor qilindi.

Tayvan markaziy axborot agentligi aniqlik kiritishicha, 100 ga yaqin reyslar bekor qilingan, maktablar yopilgan, bir qator okruglarda muassasalar ishi to‘xtatilgan va parom qatnovi cheklangan.

Chorshanba kuni ertalab to‘fon Tayvandan 230 km sharqda joylashgan bo‘lib, shamol tezligi sekundiga 53 metrga yetgan.

Bir kun oldin Tayvan markaziy meteorologiya boshqarmasi to‘fon haqida ogohlantirish e’lon qildi. “Koinu” payshanbaga o‘tar kechasi orolning janubi-sharqiy qirg‘oqlariga yetib kelishi kutilmoqda.

Avgust oyining oxirida Gonkongga “Saola” superto‘foni yopirilgan edi.