Norvegiya 2024-yilda mudofaa budjetini taxminan 20 foizga oshiradi, deb yozdi Norvegiyaning VG gazetasi moliya vaziri Tryugve Slagsvold Vedumga tayanib.
“Kelgusi yil uchun mudofaa budjetiga jami 90,8 milliard kron (taxminan 8,3 milliard dollar) ajratmoqdamiz... Bu 2023-yil uchun qabul qilingan budjetdan taxminan 20 foizga ko‘p”, — deya Vedum so‘zlaridan iqtibos keltirdi gazeta.
Bosh vazir Yonas Gars Stere qo‘shimcha pullar Ukrainaga harbiy yordam ko‘rsatish, shuningdek, Norvegiyaning mudofaa qobiliyatini oshirish uchun ishlatilishini aytdi.
“Ushbu budjet bilan biz kelgusi yilda YIMning 1,8 foizini tashkil etish niyatidamiz... Shu bilan biz belgilangan maqsadga muddatidan oldin yetib boramiz, unga ko‘ra, 2026-yilda YIMning 2 foiziga yetishimiz kerak”, — dedi moliya vaziri VG nashriga bergan intervyusida.
Nashr qayd etganidek, gap Norvegiya iyul oyida Vilnyusda bo‘lib o‘tgan sammitda amalga oshirishga va’da bergan yalpi ichki mahsulotning kamida 2 foizini mudofaaga sarflash bo‘yicha NATO dasturi haqida bormoqda.
Norvegiyaning davlat budjeti 6-oktabr kuni taqdim etilishi kutilmoqda.