“Rafiqamni izlab keldim”. Tehrondagi Ozarbayjon elchixonasida otishma sodir etgan erkak buni oilaviy sabablar bilan qilgani aytilmoqda

27-yanvar kuni ertalab Tehrondagi Ozarbayjon elchixonasida otishma sodir etgan erkak buni oilaviy sabablarga ko‘ra qilgan. U yarim yildan ortiq vaqtdan beri bedarak ketgan rafiqasini shu diplomatik vakolatxona binosida deb o‘ylagan. Eron ommaviy axborot vositalari huquq-tartibot idoralariga tayanib, dastlabki tergov davomida aniqlangan ma’lumotlarni chop etdi.

“2022-yilning aprel oyida rafiqam Tehrondagi Ozarbayjon elchixonasiga ketganicha, uyga qaytmadi. Elchixonaga qayta-qayta keldim, lekin ulardan hech qanday javob olmadim. Men rafiqam Ozarbayjon respublikasining Tehrondagi elchixonasida bo‘lib turibdi, men bilan uchrashishni istamayapti, deb o‘yladim. Bugun ertalab avvaldan tayyorlab qo‘ygan Kalashnikov avtomati bilan elchixonaga borishga qaror qildim”, — deya hibsga olingan shaxsning so‘zlarini keltiradi Asriran gazetasi.

Tergov boshidanoq erkak hujum sababini shaxsiy va oilaviy muammolar bilan izohlagandi. U elchixona binosiga ikki nafar yosh bolasi bilan kirgan.

Eslatib o‘tamiz, 27-yanvar kuni Tehrondagi Ozarbayjon elchixonasiga qurolli hujum uyushtirildi, oqibatda diplomatik missiyaning qo‘riqlash xizmati rahbari halok bo‘ldi, yana ikki qo‘riqchi yaralandi. Keyinroq hujum lahzalari aks etgan video e’lon qilindi.

Hujum yuzasidan tergov boshlangan.