Food For Life ko‘ngillilar tashkiloti poytaxtimizdagi 30-sonli yordamchi mehribonlik uyida “Barcha kasblar kerak, barcha kasblar muhim” shiori ostidagi festivalni o‘tkazdi. Bolalar bir necha daqiqa bo‘lsa-da, o‘zlarini dizayner, oshpaz, rassom va sartarosh sifatida sinab ko‘rish imkoniyatiga ega bo‘lishdi. Bolalar o‘zlari qiziqqan kasblar bilan yaqindan tanishib, hatto kimyoviy tajriba o‘tkazish imkoniyatiga ham ega bo‘lishdi.
Shuhrat Usmonov, Food For Life ko‘ngillilar tashkiloti asoschisi va direktori:
— Biz ko‘ngilochar tadbirlarni tashkil etib, animatorlarni taklif etmaymiz. Shunchaki bolalar bilan do‘stona munosabat bo‘lib, ularni kasb-hunarlar bilan yaqindan tanishtiramiz. Bolaning rivojlanishida va ijodiy o‘sishida onaning roli nihoyatda katta. Afsuski, mehribonlik uyida tarbiyalanayotganlar bunday imkoniyatdan mahrum bo‘lishadi. Biz ko‘ngillilar yordamida ana shunday ijodiy muhitni yaratib berishga harakat qilamiz.
“Bolalarni tarbiyalamang, ular baribir sizdek bo‘lishadi. O‘zingizni tarbiyalang”, deb bejiz aytishmaydi. Har qaysi jabhada bolalarga o‘rnak bo‘lishimiz kerak. Bolajonlar tadbirda faol ishtirok etishdi. Ularning ko‘zidagi quvonchni ko‘rib, bizning ham kayfiyatimiz ko‘tarildi, — deydi Shuhrat Usmonov.
Saida Karimova, Milliy gvardiya xodimi, 30-mehribonlik uyi psixologi:
— Food For Life ko‘ngillilar tashkiloti tez-tez mehribonlik uyiga kelib, turli mahorat darslarini o‘tkazishadi. Ular tarbiyalanuvchi bolalar ishtirokida qiziqarli sahna ko‘rinishlarini ham ko‘rsatishdiki, “Bolalarimiz shunchalik iste’dodlimi?” deb hayron qoldik. Bolalar sahnada biz bilmagan iste’dodlarini ochib berishdi. Shu bois bolalar Food For Life ko‘ngillilar jamoasidan hamisha minnatdor.
Mehribonlik uyida 96 nafar 7-18 yoshgacha bo‘lgan bolalar tarbiyalanmoqda. Ishonchim komilki, ularning bari iste’dodli va kelajakda o‘z o‘rnini topadigan yigit-qizlar bo‘lib ulg‘ayishadi, — deydi Saida Karimova.
Izoh (0)