Food For Life кўнгиллилар ташкилоти пойтахтимиздаги 30-сонли ёрдамчи меҳрибонлик уйида “Барча касблар керак, барча касблар муҳим” шиори остидаги фестивални ўтказди. Болалар бир неча дақиқа бўлса-да, ўзларини дизайнер, ошпаз, рассом ва сартарош сифатида синаб кўриш имкониятига эга бўлишди. Болалар ўзлари қизиққан касблар билан яқиндан танишиб, ҳатто кимёвий тажриба ўтказиш имкониятига ҳам эга бўлишди.
Шуҳрат Усмонов, Food For Life кўнгиллилар ташкилоти асосчиси ва директори:
— Биз кўнгилочар тадбирларни ташкил этиб, аниматорларни таклиф этмаймиз. Шунчаки болалар билан дўстона муносабат бўлиб, уларни касб-ҳунарлар билан яқиндан таништирамиз. Боланинг ривожланишида ва ижодий ўсишида онанинг роли ниҳоятда катта. Афсуски, меҳрибонлик уйида тарбияланаётганлар бундай имкониятдан маҳрум бўлишади. Биз кўнгиллилар ёрдамида ана шундай ижодий муҳитни яратиб беришга ҳаракат қиламиз.
“Болаларни тарбияламанг, улар барибир сиздек бўлишади. Ўзингизни тарбияланг”, деб бежиз айтишмайди. Ҳар қайси жабҳада болаларга ўрнак бўлишимиз керак. Болажонлар тадбирда фаол иштирок этишди. Уларнинг кўзидаги қувончни кўриб, бизнинг ҳам кайфиятимиз кўтарилди, — дейди Шуҳрат Усмонов.
Саида Каримова, Миллий гвардия ходими, 30-меҳрибонлик уйи психологи:
— Food For Life кўнгиллилар ташкилоти тез-тез меҳрибонлик уйига келиб, турли маҳорат дарсларини ўтказишади. Улар тарбияланувчи болалар иштирокида қизиқарли саҳна кўринишларини ҳам кўрсатишдики, “Болаларимиз шунчалик истеъдодлими?” деб ҳайрон қолдик. Болалар саҳнада биз билмаган истеъдодларини очиб беришди. Шу боис болалар Food For Life кўнгиллилар жамоасидан ҳамиша миннатдор.
Меҳрибонлик уйида 96 нафар 7-18 ёшгача бўлган болалар тарбияланмоқда. Ишончим комилки, уларнинг бари истеъдодли ва келажакда ўз ўрнини топадиган йигит-қизлар бўлиб улғайишади, — дейди Саида Каримова.
Изоҳ (0)